சீனா(China) பெரும் கனவுகளை நனவாக்குவதில் புதிய வரலாற்றை எழுதிக்கொண்டே வருகிறது. தற்போது உலகின் மிக நீளமான அதிவேக கடலடி ரயில் சுரங்கத்தைக் கட்டத் திட்டமிட்டு, சர்வதேச கவனத்தை மீண்டும் தன்னிடம் குவித்துள்ளது. வட சீனாவின் போஹாய் நீரிணையில் அமைக்கப்பட உள்ள இந்த அதிவேக ரயில் பாதை, 75 மைலும் (123 கி.மீ) நீளமுமானது. இந்த சுரங்கம் செயல்பாட்டுக்கு வந்தால், மக்கள் வெறும் 40 நிமிடங்களில் கடலுக்கு அடியில் ஒரு இடத்திலிருந்து மற்றொரு இடத்துக்கு பயணம் செய்ய முடியும் என்பது இதன் மிகப் பெரிய சிறப்பு.
இரு கடற்கரைகளுக்கு இடையே பிரம்மாண்ட பாலம்
போஹாய் நீரிணை சீனாவின் வடக்கில் கடற்கரை பிராந்தியத்தையும், கிழக்கில் உள்ள ஷான்டாங் ((Shandong) தீபகற்பத்தையும் பிரிக்கிறது. இப்போது இந்த பிரம்மாண்டத் திட்டம், போஹாய் நீரிணையில் (Bohai Strait) அமையவுள்ளதால், இது வடக்குக் கடற்கரையில் உள்ள லியாவோடாங் (Liaodong) மற்றும் கிழக்கின் ஷான்டாங் (Shandong) தீபகற்பங்களுக்கு இடையே உள்ள இரண்டு பகுதிகளையும் சுரங்க ரயில் இணைக்கப் போகிறது.
தற்போது நில வழியாக பயணம் செய்ய வேண்டுமானால், கடற்கரையை சுற்றி சுமார் 6 மணி நேரத்துக்கும் மேலாக பயணம் செய்ய வேண்டும். ஆனால் இந்த புதிய ரயில் திட்டம் அந்த பயணத்தை 40 நிமிடங்களுக்கு குறைத்து, மக்கள் வாழ்க்கையில் நேரத்தை பெரிதும் சேமிக்கப் போகிறது.
டாலியன் (Dalian) மற்றும் யாண்டை (Yantai) போன்ற முக்கியத் தொழில்துறை நகரங்களுக்கு இடையே மக்கள் மற்றும் பொருட்கள் அடிக்கடி செல்ல வேண்டியது அவசியம். எனவே, இந்த புதிய திட்டம் அந்தப் பகுதி பொருளாதாரத்தையும், வர்த்தகத்தையும் மாபெரும் அளவில் வேகப்படுத்தும்.
36 பில்லியன் டாலர் முதலீடு
சுமார் 36 பில்லியன் அமெரிக்க டாலர்கள் ( 220 பில்லியன் யுவான்) செலவில் அமைந்துள்ளது இந்த திட்டம். இதை வெறும் போக்குவரத்து திட்டமாக மட்டும் நாம் பார்க்க முடியாது. சீன அரசு இதை ஒரு மிகப்பெரிய மூலோபாய முதலீடாகக் கருதுகிறது. இது செயல்பாட்டுக்கு வந்தால், வருடத்துக்கு குறைந்தது 20 பில்லியன் யுவான் வருவாய் எளிதில் ஈட்டக்கூடியதாக இருக்கும் என்று கணிக்கப்பட்டுள்ளது.
சுரங்கத்தின் அமைப்பு 3 முக்கியப் பகுதிகளை கொண்டுள்ளது:
- இரண்டு இணையான அதிவேக ரயில் பாதைகள் – இவை ரயில்கள் மணிக்கு 155 மைல் (250 கி.மீ) வேகத்தில் செல்ல உதவும்.
- மைய சுரங்கம் – அவசரநிலை பயன்பாடு, பராமரிப்பு பணிகள், பாதுகாப்பு அமைப்புகள் போன்றவற்றுக்காக அமைக்கப்பட உள்ளது.
- இந்த வடிவமைப்பு பயணிகளின் பாதுகாப்பை அதிகரிக்கும் வகையில் திட்டமிடப்பட்டுள்ளது.
உலகின் மிகக் கடினமான பொறியியல் சவால்
இந்தத் திட்டம் மிகவும் பிரம்மாண்டமானதும், அதே சமயம் மிகப் பெரிய சவால்களும் கொண்டதாகும். கடலுக்கு அடியில் இப்படிப் பெரிய நீளம் கொண்ட சுரங்கத்தை தோண்டுவது உலகில் அரிதாகவே நடந்திருக்கிறது. மேலும், போஹாய் நீரிணை அமைந்துள்ள கடல்தளம் நிலையானதல்ல; நில அதிர்வுகள், மணல் மற்றும் களிமண் அடுக்குகள் போன்றவை எப்போதும் மாற்றம் அடைகின்றன.
இந்தச் சவால்களை சமாளிக்க, பொறியாளர்கள் சில முக்கியமான பாதுகாப்பு முறைகளை உருவாக்க வேண்டியிருக்கும்:
- கடல்நீரை தடுக்கும் மிக வலுவான நீர்ப்புகா சுரங்கச் சுவர்கள்
- பயணிகள் சுவாசிக்கத் தேவையான காற்றோட்ட அமைப்புகள்
- எதிர்பாராத ஆபத்துகளுக்கான அவசர வெளியேற்றும் பாதைகள்
- சுரங்கம் உடையும் அபாயத்தைக் குறைக்கும் அதிநவீன உலோக மற்றும் கான்கிரீட் கட்டமைப்புகள்
- இத்தகைய மேம்பட்ட பொறியியல் தொழில்நுட்பங்கள், சீனாவை உலகின் முன்னணி கட்டுமான சக்தி என மீண்டும் நிரூபிக்கின்றன.
சீனாவின் போக்குவரத்து கனவு
தற்போது இந்தத் திட்டம் முதன்மை திட்டமிடல் மற்றும் சாத்தியக்கூறு ஆய்வு கட்டத்தில் உள்ளது. அத்துடன் தொழில்நுட்ப மதிப்பீடுகள், செலவுக் கணக்கீடுகள், சூழல் ஆய்வுகள் போன்றவை செய்யப்படுகின்றன. எல்லாம் எவ்வாறு நடைபெறுகிறது என்பதை பொருத்து, இந்த சுரங்க பாதை அடுத்த 10 முதல் 15 ஆண்டுகளில் பொதுமக்கள் பயன்பாட்டிற்கு வரலாம் என கூறப்படுகிறது.
சீனா இதுவரை உலகின் நீளமான பாலங்கள், வேகமான அதிவேக ரயில்கள், மிக உயர்ந்த அணைகள் போன்ற பல சாதனைகளை படைத்துள்ளது. இப்போது இந்த புதிய கடலடி சுரங்கமும் அந்த வரிசையில் மேலும் ஒரு பெரும் சாதனையாக இருக்கும் என்பது உறுதி.
- பொருளாதாரத்திலும் மக்களின் வாழ்க்கையிலும் பெரிய மாற்றம்
- இந்த ரயில் பாதை திறக்கப்பட்டால்:
- வட சீனாவுக்கும் கிழக்குச் சீனாவுக்கும் இடையிலான பயணம் கிட்டத்தட்ட 90% நேரம் குறையும்
- பிராந்திய பொருளாதார வளர்ச்சி வேகம் பெருகும்
- மில்லியன் கணக்கான மக்கள் தினசரி பயணத்தில் நேரத்தை சேமிக்க முடியும்
- சுற்றுலா, தொழில், வர்த்தகம் ஆகியவை பல மடங்கு வளர்ச்சி அடையும்
சீனா உருவாக்கும் இந்த சுரங்கம் உலக நாடுகளுக்கு ஒரு புதிய தரத்தை அமைக்கும். நீருக்கடியில் இவ்வளவு நீளமான சுரங்கத்தை அதிவேக ரயில் ஓடக் கூடியதாக அமைப்பது என்பது ஒரு உலக சாதனையே.
போஹாய் நீரிணையில் உருவாகும் இந்த 75 மைல் நீளக்கடலடி ரயில் சுரங்கம், வெறும் போக்குவரத்து திட்டமல்ல; அது சீனாவின் தொழில்நுட்பத் திறமைக்கும், பொறியியல் தைரியத்துக்கும் ஒரு புதிய அடையாளம். சுற்றுப்புறப் பகுதிகளில் வசிக்கும் மக்களின் வாழ்க்கைத் தரத்தையும், தொழில்துறையின் வளர்ச்சியையும் இது மாற்றப் போகிறது. இந்தத் திட்டம் வெற்றியடையும்போது, உலகின் கவனத்தை ஈர்க்கும் மிகப் பெரிய கட்டுமான அதிசயங்களில் இதுவும் ஒன்று எனப்படும்.
About the Author
