தங்கம், வெள்ளி மற்றும் பிற விலைமதிப்புள்ள பொருட்களை வாங்குவதற்கு மிகவும் சிறந்த நாளாகக் கருதப்படும் தீபாவளி நாட்கள் நெருங்கி வருகிறது. இந்த நாள், செல்வம், வளம் மற்றும் அதிர்ஷ்டத்தின் அடையாளமாகக் கருதப்படுவதால், இந்திய குடும்பங்கள் தங்க நகைகள், வெள்ளிப் பொருட்கள், வாகனங்கள், மின்சாதனங்கள் போன்றவற்றை வாங்கி மகிழ்கிறார்கள். ஆனால், தங்கத்தின் விலை கடந்த சில மாதங்களாக வேகமாக உயர்ந்து வருவதால், தங்கம் வாங்குவது பலருக்கும் பெரிய சிந்தனைக்குரிய விஷயமாக மாறியுள்ளது. நிபுணர்கள் கணிப்பின்படி, இந்த ஆண்டு தங்கத்தின் விலை 10 கிராமுக்கு ரூ.1.3 லட்சம் வரை உயரக்கூடும் என கூறப்படுகிறது.
இந்த தங்க விலை உயர்வுக்குக் காரணம் என்ன..?
உலகளாவிய பொருளாதார நிலைமையின் நிச்சயமின்மை, மத்திய வங்கிகளின் தங்க கொள்முதல் அதிகரிப்பு, வட்டி விகிதங்கள் குறையும் என்ற எதிர்பார்ப்பு, முதலீட்டாளர்கள் தங்கத்தை “பாதுகாப்பான சொத்து” (Safe Asset) எனக் கருதும் மனப்பான்மையால் தான். இந்த சூழ்நிலையில், இந்திய குடும்பங்கள் வழக்கமாக தங்க நகைகளை வாங்குவது வழக்கம். ஆனால் சட்டப்படி ஒருவர் வீட்டில் எவ்வளவு தங்கம் வைத்திருக்கலாம் என்று தெரியுமா..? அதனை தெரிந்து கொள்வோம் வாருங்கள்:
தங்கம் வைத்திருக்கும் சட்ட வரம்பு 1994 CBDT (CENTRAL BOARD OF DIRECT TAXES) சுற்றறிக்கை: மத்திய நேரடி வரிகள் வாரியம் (CBDT) 1994 ஆம் ஆண்டு வெளியிட்ட சுற்றறிக்கை (Circular No.1916, dated 11-05-1994) படி, ஒரு நபர் எவ்வளவு அளவு தங்க நகைகளை வைத்திருக்கலாம் என்பது குறித்து வழிகாட்டல் அளிக்கப்பட்டுள்ளது. அந்த சுற்றறிக்கையின் படி, ஒருவரிடம் காணப்படும் தங்க நகைகள் பின்வரும் அளவில் இருந்தால், அதை பறிமுதல் செய்ய முடியாது: திருமணமான பெண் – 500 கிராம், திருமணமாகாத பெண் – 250 கிராம், ஆண் – 100 கிராம் வரை தங்கம் வைத்திருக்கலாம்.
இவை அனுமதிக்கப்பட்ட வழிகாட்டும் அளவுகள் மட்டுமே என்பதும் குறிப்பிடத்தக்கது. அதாவது, ஒருவர் இதற்கும் மேல் தங்கம் வைத்திருந்தாலும், அதற்கான சட்டபூர்வமான வருமான ஆதாரம், மரபு வழி சான்று , அல்லது குடும்பப் பரம்பரை மூலதானம் சரியாக வைத்து இருந்தால் , அதிகாரிகள் அதை பறிமுதல் செய்ய மாட்டார்கள். இதுகுறித்து CBDT 2016 டிசம்பரில் வெளியிட்ட விளக்கத்தில், “வெள்ளை பணத்தில் வாங்கிய தங்கம், பரிசாக பெற்றது அல்லது மரபாகக் கிடைத்தது என்றால், அதன் மீது வருமானவரி சட்டப்படி எந்த விதமான நடவடிக்கையும் எடுக்கப்படாது” என்று தெளிவுபடுத்தியுள்ளது.
தங்கம் வாங்கும் போது ரொக்கம் கொடுப்பதில் உள்ள சட்டக் கட்டுப்பாடுகள்:
தங்கம் வாங்கும்போது, Income Tax Act – Section 269ST என்ற பிரிவை தெரிந்துகொள்வது மிகவும் முக்கியம். இந்த சட்டம் 2017 முதல் நடைமுறையில் உள்ளது. இதன் படி,
ஒரே நபரிடமிருந்து, ஒரே நாளில், அல்லது ஒரே நிகழ்வுக்காக ரூ.2,00,000 (ரூ. 2 லட்சம்) அளவுக்கு மேல் ரொக்கமாக பணம் கொடுப்பது சட்டவிரோதம்.
ஒருவர் ஒரே நாளில் ரூ. 2 லட்சத்தை மீறி தங்கம் வாங்கினால், அந்த ரொக்கப் பரிவர்த்தனைக்கு Section 271DA படி அதே அளவு அபராதம் விதிக்கப்படும். உதாரணமாக, ஒருவர் ஒரு நாளில் ரொக்கமாக ரூ. 3 லட்சம் மதிப்பில் தங்கம் வாங்கினால், அந்த தொகையான ரூ. 3 லட்சம் அபராதமாக விதிக்கப்படும்.
அதனால், ரூ.2 லட்சத்தைத் தாண்டும் தங்கக் கொள்முதல்கள் அனைத்தும் வங்கி வழியாக — டெபிட்/கிரெடிட் கார்டு, காசோலை, UPI, NEFT அல்லது RTGS வழியாக செய்யப்பட வேண்டும். மேலும், ரூ.50,000-க்கும் மேற்பட்ட தங்க கொள்முதல்களில் PAN அட்டை விவரங்கள் கட்டாயம் அளிக்கப்பட வேண்டும். இதன் மூலம் அரசு வரி வருமானத்தை கண்காணிக்க முடியும்.
வீட்டில் தங்கம் வைத்திருந்தால் ஆதாரங்கள் முக்கியம்:
ஒருவர் தங்கத்தை வைத்திருப்பது தன்னிச்சையாகக் குற்றம் அல்ல. ஆனால் வருமான வரித்துறை (Income Tax Department) அந்த தங்கத்தின் மூலதனத்தை நிரூபிக்க முடிந்தால் மட்டுமே அது சட்டபூர்வமாக கருதப்படும்.
அதற்காக பின்வரும் ஆதாரங்களை வைத்திருப்பது அவசியம்:
- தங்கம் வாங்கிய பில்கள் மற்றும் ரசீதுகள்
- வங்கி பரிமாற்ற பதிவுகள் (NEFT, RTGS, UPI, கார்டு விவரங்கள்)
- மரபு வழி பரிசு எனக் கிடைத்திருந்தால், வழங்கிய நபரின் உறவு / மரபு சான்று
- திருமண பரிசாக இருந்தால், திருமணச் செலவுக் கணக்கு அல்லது சாட்சிகள்
இவை இருந்தால், தங்கத்தின் மூலத்தை அதிகாரிகளிடம் விளக்கி எந்த விதமான சிக்கலும் இல்லாமல் வைத்திருக்க முடியும். தமிழ்நாட்டில் தங்கம் பாரம்பரியச் சின்னமாகவும், நம்பிக்கையின் அடையாளமாகவும் கருதப்படுகிறது. பெரும்பாலான குடும்பங்கள் தங்கத்தை முதலீட்டின் வடிவமாகக் கருதுகின்றன. திருமணங்கள், விழாக்கள் போன்ற நேரங்களில் தங்கம்(GOLD) வாங்குவது வழக்கம்.
ஆனால், தமிழ்நாட்டில் கூட மத்திய வரி சட்டங்களே (CBDT circular, Income Tax Act) செயல்படுவதால், மேலே குறிப்பிட்ட வரம்புகள் மற்றும் விதிமுறைகள் அங்கேயும் பொருந்தும். வருமானவரி அதிகாரிகள் சரிபார்ப்பு நடவடிக்கை (Search or Survey) மேற்கொண்டால், “திருமணமான பெண் – 500g”, “திருமணமாகாத பெண் – 250g”, “ஆண் – 100g” என்ற அளவுகள் வரை தங்கத்தைப் பிடிக்க மாட்டார்கள். அதற்கும் மேலாக இருந்தால், வருமான ஆதாரம் கேட்கப்படும்.
தமிழ்நாட்டில் பெரும்பாலான தங்க வணிகர்கள், வாடிக்கையாளர்களிடம் PAN விவரங்களைச் சேகரித்து, ரூ.2 லட்சத்தை மீறும் கொள்முதல்களுக்கு டிஜிட்டல் பரிவர்த்தனைகளை ஊக்குவிக்கிறார்கள்.
தங்க விலை – சந்தை நிலவரம்
தற்போதைய தகவல்களின் படி, சர்வதேச தங்க விலை உயர்வைத் தொடர்ந்து, இந்திய சந்தையில் தங்க விலை 10 கிராம் ஒன்றுக்கு ரூ.1.3 லட்சம் வரை உயரும் என்று எதிர்பார்க்கப்படுகிறது. 2026 தொடக்கத்தில், உலக பொருளாதார மந்தநிலை நீடித்தால், விலை ரூ.1.5 லட்சம் வரை செல்லும் வாய்ப்பு உள்ளது.
இந்த சூழலில், நிபுணர்கள் கூறுவது: “தங்கத்தை குறுகிய கால இலாப நோக்கில் அல்லாமல், நீண்டகால முதலீட்டாகக் கருதி வாங்குவது நல்லது. மேலும், சட்டப்படி PAN, ரசீது, வங்கி பரிமாற்றம் போன்றவை கண்டிப்பாக இருக்க வேண்டும்.”
தங்கம் வைத்திருப்பது குற்றமல்ல, ஆனால் அதன் மூலத்தனம் தெளிவாக விளக்கக்கூடியதாக இருக்க வேண்டும். சட்ட விதிகளைக் கடைபிடிப்பதன் மூலம் நிம்மதியாகவும், சந்தோஷத்துடனும் நம் நகைகள் வைத்து இருக்கலாம்.
About the Author
