தவெக தலைவர் விஜய் பிரச்சாரம் செய்யும் இடங்களை எல்லாம் அவரது கட்சியினர் துவம்சம் செய்துவிடுகின்றனர். மேலும், விஜயின் பரப்புரை வாகனத்தின் மேல் ஏறி நின்று அச்சமூட்டி வந்தனர். மின் கம்பங்கள், மரங்களில் ஏறி பீதியை ஏற்படுத்தி வந்தனர். இது மாதிரியான செய்கைகள் தவிர கொள்கை ரீதியாகவும் தவெகவினர் தற்குறிகள் என்று கடுமையாக விமர்சிக்கப்பட்டு வருகின்றனர்.
இதற்கு பதிலடியாக, உள்ளரங்கில் நேற்று நடந்த காஞ்சிபுரம் மாவட்ட மக்கள் சந்திப்பு நிகழ்ச்சியில் பேசிய விஜய், ‘’நாங்கள் தறிகள் அல்ல ஆச்சரியக்குறிகள், எதிரிகளை கேள்விக்குறியாக்க வந்தவர்கள்’’ என்று ஆவேசப்பட்டிருந்தார்.
இது குறித்து அமைச்சர் ரகுபதியிடம் செய்தியாளர்கள் கேள்வி எழுப்ப, ‘’அவர் ஆச்சரியக்குறியாக இருந்தாலும், தற்குறியாக இருந்தாலும், எந்தக் குறியாக இருந்தாலும் எங்களுக்கு கவலையில்லை. எங்களுடைய குறி தேர்தல் குறி. யாரைக்கண்டும் அஞ்ச வேண்டிய அவசியம் திமுகவுக்கு இல்லை. எங்களுக்கு போட்டியும் யாரும் இல்லை. களத்தில் இருக்கக்கூடிய எல்லோரையும் நாங்கள் சமமாகத்தான் பார்க்கிறோம். அவர்கள் எல்லோருமே அரசியல் எதிரிகள்தானே தவிர, தனிப்பட்ட முறையில் அவர்கள் யாரோடும் பகைமை இல்லை’’ என்றார்.
மேலும், ‘’தமிழ்நாட்டு மக்களை திராவிட மாடல் அரசால்தான் வாழ வைக்க முடியும் என்பதை கடந்த 5 ஆண்டுகளில் நிரூபித்திருக்கிறது திமுக. நாங்கள் சொன்னதை செய்திருக்கிறோம். செய்வதைத்தான் சொல்லி இருக்கிறோம். பொய்யான வாக்குறுதிகளை நாங்கள் ஒருபோதும் கொடுப்பதில்லை. பலர் ஏமாற்று வேலைகளைச் செய்கிறார்கள். அவர்களின் ஏமாற்று வேலைகள் எதுவும் மக்களிடம் எடுபடாது.
எங்கள் ஆட்சியில் கொடுத்த டிவி இன்றும் ஓடிக்கொண்டிருக்கிறது. வேறு ஆட்சியில் கொடுக்கப்பட்டதெல்லாம் காயலான் கடைக்கு போய்விட்டது. தரமான பொருட்களை தருகின்ற ஆட்சி தளபதியின் ஆட்சி.
திராவிட இயக்கத்தின் வரலாற்றை இன்றைய இளைய தலைமுறையினர் தெரிந்து கொள்ள வேண்டும் என்பதற்காக அறிவுத்திருவிழா நடத்தினோம். விஜய்க்கு அதுபற்றிய புரிதல் கிடையாது. அவருக்கு அதில் அக்கறையும் கிடையாது. அவருடைய ஒரே நோக்கம் ஆட்சியை கைப்பற்ற வேண்டும் என்பதுதான்.
மற்றபடி தமிழர்களை பற்றியோ, தமிழ் மக்களின் கொள்கைகளை பற்றியோ, பண்பாட்டை பற்றியோ, கலாச்சாரத்தை பற்றியோ எந்தவிதமான கவலையும் கிடையாது.
தரக்குறைவாக பேசி மக்கள் மத்தியில் தன்னைத்தானே தரம் தாழ்த்திக் கொண்டிருக்கிறார் விஜய்’’என்றார்.
கொள்கை எதிரி என்று சொல்லிவிட்டு பாஜகவை விமர்சிப்பதில்லையே விஜய்? என்ற கேள்விக்கு, ’’ஒரு காலத்தில் ஸ்லீப்பர் செல்லாக இருந்த விஜய், இன்றைக்கு அரசியல் தளத்திற்கு வந்திருக்கிறார். அதனால்தான் சொல்கிறேன் பாஜகவின் சி டீம் தவெக’’என்றார் அமைச்சர் ரகுபதி.
About the Author
