ஒரு திரைப்படத்தில் கதாநாயகன் கிராமத்துப் பஞ்சாயத்தில் தீர்ப்பு சொல்வார். அந்த விசாரணை முறையையும், வாதங்களையும், கதாநாயகனின் குறுக்கு கேள்விகளையும், மதிநுட்பத்தையும் சாலையோரமாக காரில் சென்ற ஒரு நீதிபதி, காரை நிறுத்தச் சொல்லி கவனிப்பார். கிராமத்துப் பஞ்சாயத்தில் உடனடியாகத் தீர்ப்பு வழங்கி, இரு தரப்பும் அதை ஏற்றுக்கொண்டு செல்வதைப் பார்க்கும் நீதிபதி தன்னுடைய கார் ஓட்டுநரிடம், “இதையே நம்ம கோர்ட்டுல விசாரிச்சா எவ்வளவு காலத்துல தீர்ப்பு சொல்லுவோம்?” என்று கேட்பார். “வாய்தா, அப்பீல் எல்லாத்தையும் சேர்த்தா ஒரு பத்து இருபது வருசமாக்கிட மாட்டீங்களா?” என்று அந்த ஓட்டுநர் திருப்பிக் கேட்பார்.
கிராமத்துக் கட்டப் பஞ்சாயத்துகள் என்பவை சட்டப்பூர்வமானவையல்ல. அவற்றை கங்காரு நீதிமன்றங்கள் என்கிறார்கள். அவற்றின் தீர்ப்புகளுக்கு சட்ட அங்கீகாரம் கிடையாது. எனினும், அவற்றில் உடனுக்குடன் வழங்கப்படும் தீர்ப்புகளை சட்டப்பூர்வமான நீதிமன்ற நடவடிக்கைகளுடன் ஒப்பிடும்போது, நீதிமன்றங்களில் ஏற்படும் காலதாமதத்தால், கிராமத்து கட்டப்பஞ்சாயத்தே பரவாயில்லை என்ற மனநிலை மக்களிடம் ஏற்படுவது இயல்பாகிவிடுகிறது. தமிழ்நாட்டை உலுக்கியெடுத்த ஒரு கொலை-கொள்ளை வழக்கின் தீர்ப்பின் காலமும் அந்தத் திரைப்படத்தில் நீதிபதியின் கார் ஓட்டுநர் சொல்வது போலத்தான் அமைந்திருக்கிறது.
2004-2005ஆம் ஆண்டுகளில் வடநாட்டைச் சேர்ந்த கொள்ளையர்கள் தமிழ்நாட்டில் தனிப்பட்ட பங்களாக்களை நோட்டம்விட்டு, கொள்ளையடிப்பதும், கொள்ளைக்காக வீட்டில் தனியாக இருப்பவர்களைக் கொலை செய்வதும் வழக்கமாக இருந்தது. சேலம் -சென்னை புறவழிச்சாலையில் அப்போது அதிக கட்டடங்கள் கிடையாது. கட்சி மாநாடுகள் நடத்தக்கூடிய அளவுக்கு பரந்து விரிந்த காலி இடங்கள் இருந்தன. அந்தப் பகுதியில் தனியாக ஒரு பங்களா இருந்தது. அந்த பங்களாவை குறிவைத்து இரவு நேரத்தில் கொள்ளையர்கள் உள்ளே நுழைந்தனர். பங்களா உரிமையாளரான உள்ளூர் காங்கிரஸ் பிரமுகர் தாளமுத்து நடராஜன் என்பவரைக் கொலை செய்துவிட்டு, வீட்டில் இருந்தவற்றைக் கொள்ளையடித்துவிட்டுத் தப்பினர். அந்தக் கொலையும் கொள்ளையும் அப்போது பெரும் பரபரப்பை உண்டாக்கியது.
2005ஆம் ஆண்டில் கும்மிடிப்பூண்டி தொகுதியின் அ.தி.மு.க. எம்.எல்.ஏ.வாக இருந்த சுதர்சனம் என்பவர் வீட்டில் ஒரு நள்ளிரவு நேரத்தில் வடமாநில பவாரியா கொள்ளையர்கள் புகுந்தனர். வீட்டில் உள்ளவர்களைத் துப்பாக்கி, மற்றும் கொடூர ஆயுதங்களால் மிரட்டி கொள்ளையடிக்க முயன்றனர். அந்தக் கொள்ளைக் கும்பலுக்கு அன்றைய ஆளுங்கட்சியான அ.தி.மு.க.வின் எம்.எல்.ஏ ஆளானார். சுதர்சனம் எம்.எல்.ஏ. கொள்ளையர்களால் கொல்லப்பட்டார். அவரது குடும்பத்தினர் படுகாயமடைந்தனர். அந்தக் கொலையும் கொள்ளையும் மக்களை அதிர வைத்தது. அரசியல்ரீதியாகவும் பெரும் தாக்கத்தை ஏற்படுத்தியது.
கொலை செய்து-கொள்ளையடித்துவிட்டுத் தப்பிய வடமாநிலக் கொள்ளையர்களைப் பிடிப்பதற்காக காவல்துறை உயரதிகாரி ஜாங்கிட் தலைமையில் தனிப்படைகள் அமைக்கப்பட்டன. அந்தப் படைகள் பல்வேறு இடங்களிலும் தேடுதல் வேட்டை நடத்தியது. போலீஸ் அதிகாரி ஜாங்கிட்டின் வியூகமும், வடமாநில போலீசாருடன் தமிழ்நாடு போலீசார் ஏற்படுத்திய தொடர்பும் கொள்ளையர்களைப் பற்றிய விவரங்களைத் துல்லியமாக சேகரிக்க உதவியது. அதன் மூலமாக ராஜஸ்தான், ஹரியானா உள்ளிட்ட மாநிலங்களுக்கு ஜாங்கிட் தலைமையிலான படை சென்று கொள்ளையர்களைக் கண்டுபிடித்து கைது செய்தது. 5 கொள்ளையர்கள் சிக்கினர்.
இந்த உண்மை நிகழ்வை அடிப்படையாக வைத்துதான் தீரன் அதிகாரம் என்ற திரைப்படம் வந்தது. அந்தப் படம் வந்தது 2017ஆம் ஆண்டில். கொள்ளையும் கொலையும் நடந்தது 2005ஆம் ஆண்டில். ஏறத்தாழ 20 ஆண்டுகள் கழிந்த நிலையில், சிக்கிய 5 குற்றவாளிகளில் ஒரு நபர் இறந்து போன சூழலில், மீதி நால்வரில் மூவருக்கு ஆயுள் தண்டனையும் ஒருவரை விடுவித்தும் நீதிமன்றம் தீர்ப்பளித்துள்ளது. இந்தத் தீர்ப்பைக் கொல்லப்பட்ட எம்.எல்.ஏ.வின் குடும்பத்தினர் வரவேற்றுள்ளனர். அப்போது சிறுமியாக இருந்தவர் கொடுத்த வாக்குமூலம், இப்போதைய தீர்ப்பு வரை முக்கியத்துவமானதாக இருந்துள்ளது. எனினும், 20 ஆண்டுகள் கழித்து தீர்ப்பும் தண்டனையும் வழங்கப்பட்டுள்ள நிலையில், இனி மேல்முறையீடுகள் உள்ளிட்டவற்றுக்கான வாய்ப்புகளும் உள்ளன. இதுவே இறுதித் தீர்ப்பு-மாற்ற முடியாத தண்டனை என்றாகிவிடாது.
கொல்லப்பட்ட எம்.எல்.ஏ. சுதர்சனம் ஜெயலலிதா ஆட்சியில் எம்.எல்.ஏ.வாக இருந்தார். அந்த ஜெயலலிதா அடிக்கடி ஓய்வெடுக்கும் இடம் கொடநாடு எஸ்டேட்டாகும். ஜெயலலிதா மரணத்திற்குப் பிறகு, அந்த எஸ்டேட் பங்களாவுக்குள் மர்ம நபர்கள் நுழைந்து கொள்ளை அடித்ததுடன், காவலாளி ஒருவரை கொலையும் செய்தனர். பின்னர் தொடர்ச்சியான மர்ம மரணங்களும் நிகழ்ந்தன. இதில் ஜெயலலிதாவை அம்மா என்று சொன்ன கட்சி நிர்வாகிகளே சம்பந்தப்பட்டிருப்பதும், அது கட்சித்தலைமை வரை குற்றச்சாட்டுக்குள்ளாக்கி இருப்பதும் தமிழ்நாடு அறியும். கும்மிடிப்பூண்டி வழக்கில் தீர்ப்பு கிடைக்க 20 ஆண்டுகள். கொடாநாட்டுக்கு எத்தனை காலமோ?
About the Author
