திமுக – அதிமுக – தவெக : செங்கோட்டையன் கடந்து வந்த பாதை 

கொங்கு மண்டலத்தில் அதிமுகவின் முகமாக அரை நூற்றாண்டுகளுக்கு மேலாக அறியப்பட்டு வந்தவர் செங்கோட்டையன்.  காங்கிரஸ் குடும்பத்தில் பிறந்தாலும் திமுகவில் தனது அரசியல் பயணத்தை தொடங்கிய செங்கோட்டையன்,   எம்.ஜி.ஆர். அதிமுக தொடங்கிய காலத்தில் இருந்தே அக்கட்சியில் களப்பணியாற்றி வந்தார். 

அதிமுக சந்தித்த முதல் தேர்தலிலேயே எம்.எல்.ஏ. ஆன செங்கோட்டையன்  9 முறை  அதிமுக எம்.எல்.வாக இருந்து அமைச்சரவையிலும் அங்கம் வகித்தார்.  கோபி செட்டிப்பாளையம் தொகுதியில் மட்டும் தொடர்ந்து 8 முறை எம்.எல்.ஏ.வாக தேர்வாகி, இதன் மூலம் தமிழக அரசியல் வரலாற்றில் ஒரே தொகுதியில் அதிகம் முறை வென்றவர் என்ற பெருமையைப் பெற்றவர் செங்கோட்டையன்.   

எம்.ஜி.ஆர்.  மற்றும் ஜெயலலிதாவின் குட் புக்கில் இடம் பிடித்த அளவுக்கு எடப்பாடி பழனிசாமியின் குட் புக்கில் இடம்பிடிக்க முடியாமல் போன காரணத்தால் அதிமுகவில் இருந்து நீக்கப்பட்டார்.  அடுத்து என்ன செய்யப்போகிறார் செங்கோட்டையன்? எந்த கட்சியில் இணையப்போகிறார்? என்கிற பரபரப்பு எழுந்த நிலையில் அவர் தவெகவில் இணைந்துள்ளார்.

எப்போது தொடங்கியது செங்கோட்டையன் அரசியல் பயணம்?

ஈரோடு மாவட்டத்தில் கோபி செட்டிப்பாளையம் அடுத்த குள்ளம்பாளையம் கிராமத்தைச் சேர்ந்தவர் செங்கோட்டையன்.  இவரது பெற்றோர் காங்கிரஸ் கட்சியினர் என்றாலும் படிக்கும் போதே திமுக மாணவர் அணியில் இணைந்து பணியாற்றினார். அதற்கு இரண்டு பேர் காரணமாக இருந்தார்கள்.  ஒருவர் எம்.ஜி.ஆர்.  இன்னொருவர் தனது சித்தப்பா.  செங்கோட்டையனின் சித்தப்பா திமுககாரர்.  அவர் ஒன்றிய சேர்மனாக இருந்தார்.  எம்.ஜி.ஆரின் தீவிர ரசிகராக இருந்த செங்கோட்டையன்,   எம்.ஜி.ஆர். திமுகவில் இருந்ததால் தன்னையும் திமுகவில் இணைத்துக்கொண்டு அக்கட்சிக்காக உழைத்து வந்தார்.  

1970களில் திடீரென்று  தன் சித்தப்பாவுக்கு உடல்நிலை சரியில்லாமல் போய்விட்டதால் அப்போது வந்த ஊராட்சி மன்ற தேர்தலில் தனக்கு பதிலாக செங்கோட்டையனை களமிறக்கினார்.  திமுக சார்பில் அந்த தேர்தலில் வென்று ஊராட்சி மன்ற தலைவர் ஆனதோடு அல்லாமல் ஊராட்சி ஒன்றிய குழு துணைத்தலைவரும் ஆனார் செங்கோட்டையன். 

1972ல் திமுகவில் இருந்து விலகி எம்.ஜி.ஆர். அதிமுகவை தொடங்கியபோது அதிமுகவில் இணைந்தார் செங்கோட்டையன்

எம்.ஜி.ஆரின் குட் புக்கில் இடம்:

அதிமுகவில் முக்கிய பொறுப்புகளில் இருந்த கோவை செழியன், வேலப்பன், இந்திரகுமாரி போன்றவர்கள் கட்சியை விட்டு வெளியேறிய சமயத்தில் கோவையில் ஒரு பொதுக்குழுவை கூட்ட வேண்டும் என்று முடிவெடுத்தார் எம்.ஜி.ஆர்.  இதற்காக  எம்.ஜி.ஆர். அமைத்த குழுவின்  பொருளாளர் செங்கோட்டையன்.  அரங்கநாயகத்தை குழுவின் தலைவராகவும், மணிமாறனை குழுவின் செயலாளராகவும் நியமித்திருந்தார் எம்.ஜி.ஆர்.  

அந்த சமயத்தில் அதிமுகவின் பொதுக்குழுவில் 290 பேர் உறுப்பினர்களாக இருந்தனர். 

அன்றைக்கு இருந்த அதிமுகவின் பொருளாதார நெருக்கடியில் அதை சமாளித்து பொதுக்குழுவை வெற்றிகரமாக நடத்த முக்கியக் காரணமாக இருந்தவர் செங்கோட்டையன்.  இதனால் எம்.ஜி.ஆரின் குட் புக்கில் இடம்பிடித்தார் செங்கோட்டையன். 

சத்யா ஸ்டூடியோவில் இருந்த எம்.ஜி.ஆர்.  செங்கோட்டையனை அழைத்து கட்டிப்பிடித்து வாழ்த்து தெரிவிக்கும் அளவுக்கு அவரது குட் புக்க்கில் இடம்பிடித்தார்.   அப்போது செங்கோட்டையனுக்கு வயது 23.

அதன் பின்னர் 6 மாதங்கள் கழித்து அவிநாசியில் ‘சிறு விவசாயிகள் மாநாடு’ நடத்தினார் எம்.ஜி.ஆர்.  அதற்கும் செங்கோட்டையனை  பொருளாளராக நியமித்தார் எம்.ஜி.ஆர்.   நிதிகள் திரட்டுவதற்காக மாநாட்டின் உள்ளே செல்வதற்கு 2 ரூபாய் கட்டணம் நிர்ணயித்தார் செங்கோட்டையன்.    மாநாட்டை சுற்றிலும் கேண்டீன் அமைக்கச் சொல்லி அதற்கும் கட்டணம் வசூலித்தார்.  இதனால் 2 லட்சத்து 30 ஆயிரம் ரூபாய் வசூலானது.மாநாட்டு செலவுகள் போக மீதப்பணத்தை எம்.ஜி.ஆரிடம் ஒப்படைத்தார் செங்கோட்டையன்.  இதனால் எம்.ஜி.ஆரின் இதயத்திலேயே நீங்கா இடம் பிடித்துவிட்டார் செங்கோட்டையன்.

1977 சட்டமன்ற தேர்தலில் கோபி செட்டிப்பாளையம் தொகுதியில் போட்டியிட விருப்ப மனு கொடுத்திருந்தார் செங்கோட்டையன்.  ஆனால் மாவட்ட செயலாளராக இருந்த கே.என்.கே.ராமசாமிக்கு கோபி தொகுதியை ஒதுக்கிவிட்டார் எம்.ஜி.ஆர்.  ஜி.கே.சுப்பிரமணியனுக்கு பவானி தொகுதியை ஒதுக்கிவிட்டார்.  சத்தியமங்கலத்தில் செங்கோட்டையனை களமிறக்கினார் எம்.ஜி.ஆர்.  

சத்தியமங்கலம் தொகுதி காங்கிரஸ் காரர்கள் அதிகம் இருக்கும் தொகுதி என்பதால் அந்த தொகுதியில் வெற்றி பெற முடியுமா? என்ற சந்தேகத்தை எம்.ஜி.ஆரிடமே எழுப்பினார் செங்கோட்டையன்.    அதற்கு எம்.ஜி.ஆர்.,  ‘’என் பெயரைச் சொல் நீ வெற்றி பெற்று விடலாம்’’ என்று சொல்லி நம்பிக்கை தந்தார். அப்படியேச் செய்து வென்றார் செங்கோட்டையன்.

20 ஆயிரம் பேர் காலில் விழுந்த செங்கோட்டையன்:

அப்போதெல்லாம்  இரவு 10 மணிக்குள் பிரச்சாரத்தை முடித்துவிட வேண்டும் என்கிற தேர்தல் ஆணையத்தின் விதிமுறைகள் இல்லை. காலை 8 மணிக்கு தொடங்கி நள்ளிரவு 1 மணி வரையிலும் பிரச்சாரம் செய்தார் செங்கோட்டையன்.  பெட்ரோ மாக்ஸ் லைட்டை தலையிலும் தோளிலும் வைத்து சுமந்தபடி முன்னே நான்கைந்து பேர் ஓடி ஒவ்வொரு வீட்டின் கதவை தட்டிச்செல்வார்கள்.   கதவை திறந்து வெளியே வந்து நின்றதும் அவர்கள் யார் என்றே முகம் பார்க்க நேரம் இல்லாமல் அவர்களின் காலில் சடாரென்று விழுந்து’இரட்டை இலைக்கு’ ஓட்டு போடுங்க என்று சொல்லிவிட்டு ஓடுவார் செங்கோட்டையன்.

தேர்தல் பரப்புரை பயணத்தின் போது சத்தியமங்கலம் சென்ற எம்.ஜி.ஆர்., ‘’என் பெயரைச் சொன்னால் வெற்றி விடுவாய் என்று நம்பிகையளித்து ஒரு இளைஞரை நிறுத்தி இருக்கிறேன்.  என் நம்பிக்கையை காப்பாற்றுங்கள்’’ என்று கேட்டுக் கொண்டார் எம்.ஜி.ஆர். அந்த தேர்தலில் வென்று 25 வயது எம்.எல்.ஏ. ஆனார் செங்கோட்டையன். இவர் மட்டுமல்ல அப்போது அதிமுகவில் ஏறத்தாழ 47 பேர் இளைஞர்கள் எம்.எல்.ஏக்கள் ஆனார்கள்.

கேசரி செய்யச் சொன்ன எம்.ஜி.ஆர்.

1980ல் அதிமுக ஆட்சி கலைக்கப்பட்ட பின்னர் நடந்த பாராளுமன்ற தேர்தலில் கோபி செட்டிபாளையம், சிவ காசி என்ற இரண்டு தொகுதிகளில் மட்டுமே அதிமுக வென்றது.  சட்டமன்ற பொதுத்தேர்தலில் கோபி செட்டிப்பாளையத்தில் போட்டியிட்டார் செங்கோட்டையன்.  தேர்தல் பிரச்சாரக்கூட்டத்தில்,  ’’நான் என்ன தவறு செய்தேன்? ஏன்  ஆட்சியைக் கலைத்தார்கள்?’’ என்று இரண்டு வரி மட்டுமே பேசிவிட்டு சென்றார் எம்.ஜி.ஆர்.   அந்த சட்டமன்ற தேர்தல் முடிவுகள் அறிவிக்கப்பட்ட போது முதலில் கோபி செட்டிப்பாளையம் தொகுதியின் வெற்றிதான் அறிவிக்கப்பட்டது.  வெற்றிச்செய்தியை கேட்ட உடனே, ‘’செங்கோட்டையன் வெற்றி பெற்றுவிட்டான். கேசரி ரெடி பண்ணுங்க’’ என்று ராமாவரம் தோட்டத்தில் பரபரப்பானார் எம்.ஜி.ஆர்.

ஜெயலலிதா குட் புக்கில் இடம்:

1984ல் எம்.ஜி.ஆர்.  அமெரிக்காவில் சிகிச்சை பெற்று வந்த போது தமிழ்நாடு முழுவதும் 512 இடங்களில் ஜெயலலிதா தேர்தல் பிரச்சாரம் செய்தார்.  ஈரோடு மற்றும் கோவை மாவட்டங்களுக்கு செங்கோட்டையன் பொறுப்பேற்றிருந்தார்.  அப்போது செங்கோட்டையனுக்கு ஜெயலலிதாவுடன் நல்ல அறிமுகம் ஏற்பட்டது.

எம்.ஜி.ஆரின் மறைவுக்கு பின்னர் ஜானகி அணி – ஜெயலலிதா அணி என்று அதிமுகவில் பிளவு ஏற்பட்டபோது, ஜெயலலிதா பக்கம் நின்ற 33 பேரில் ஒருவர் செங்கோட்டையன்.

சேவல் சின்னத்திலும் வெற்றி:

எம்.ஜி.ஆரின் மறைவுக்கு பின்னர் பெரும்பான்மையை நிரூபிக்க முடியாததால் ஜானகியின் ஆட்சி கலைந்தது.  அதன் பின்னர் நடந்த தேர்தலில் அதிமுகவில் இரு அணிகளின் சர்ச்சையினால் இரட்டை இலை சின்னம் முடக்கப்பட்டது.  ஜெயலலிதாவுக்கு சேவல் சின்னமும், ஜானகிக்கு இரட்டைப்புறா சின்னமும் கிடைத்தது.  சேவலுக்கு 27 இடங்களும், இரட்டைப்புறாவுக்கு 1 இடம் மட்டுமே கிடைத்தன. சேவல் சின்னத்திலும் நின்று வென்றார் செங்கோட்டையன்.  

ஜெயலலிதாவின் டூர் பிளான்:

1984 தேர்தலில் ஈரோடு, கோவை மாவட்ட பிரச்சாரங்களின் போது நிகழ்ச்சி நிரல்களை வகுக்கும் செங்கோட்டையனின் வல்லமமையை கவனித்திருந்த ஜெயலலிதா, பின்னாளில் அதிமுகவின் பொதுச்செயலாளர் ஆன பின்னர் தனது தேர்தல் பிரச்சார பயணங்களை வகுக்கும் பொறுப்பினை செங்கோட்டையனுக்கு அளித்திருந்தார்.

சர்ச்சை:

எம்.ஜி.ஆர் மறைவுக்கு பின்னர் தன் பக்கம் வந்ததோடு அல்லாமல் அதன்பின்னர் திருநாவுக்கரசு, கே.கே.எஸ்.எஸ்.ஆர். உள்ளிட்டோர் வெளியேறிய பின்னரும் கூட தன் பக்கம் நின்றதால் தனக்கு விசுவாசமாக இருந்து வந்ததால் செங்கோட்டையன் மீது அதிக நம்பிக்கை வைத்திருந்தார் ஜெயலலிதா.  பிரச்சார பயணத்தின் போது செங்கோட்டையன் வீட்டில்  தங்கும் அளவுக்கு அவர் மீது நம்பிக்கை வைத்திருந்தார் ஜெயலலிதா.

1991 -1996 ஆட்சிக்காலத்தில் செங்கோட்டையனுக்கு போக்குவரத்து துறை அமைச்சர் பொறுப்பு வழங்கினார் ஜெயலலிதா.   2011 -2016 ஆட்சிக்காலத்தில் விவசாயம் மற்றும் வேளாண் துறை மற்றும் தகவல் தொழில்துட்ப துறை அமைச்சர் பொறுப்பை வழங்கினார் ஜெயலலிதா.  அதன் பின்னர் 2016 ஆட்சியில் பழனிசாமியின் அமைச்சரவையில் பள்ளிக் கல்வித்துறை அமைச்சராக பொறுப்பு வகித்தார் செங்கோட்டையன்.

அப்படிப்பட்ட ஜெயலலிதாவே செங்கோட்டையனை கட்சியை விட்டு நீக்கினார்.

செங்கோட்டையனின் மனைவி ஈஸ்வரி, தன் கணவர் வீட்டுக்கே வருவதில்லை என்று ஜெயலலிதாவிடம் கண்ணீர் விடும் அளவுக்கு நடிகை சகவாசம் உள்ளிட்ட சர்ச்சைகளில் சிக்கினார்.  இதனால் செங்கோட்டையனை ஓரங்கட்டி வைத்தார் ஜெயலலிதா.

தேடி வந்த முதல்வர் நாற்காலி:

ஜெயலலிதாவின் மறைவுக்கு பின்னர், தான் ஆசைப்பட்ட படி சசிகலாவால் முதலமைச்சர் நாற்காலியில் உட்கார முடியாமல் போனதால் அந்த வாய்ப்பு அதிமுகவின் சீனியர் செங்கோட்டையனுக்கு சென்றது.  ஆனால் பல காரணங்களால் அந்த நாற்காலி அவர் வசம்  போகவில்லை.  அப்போது சமயோசிதமாக செயல்பட்டு,  எடப்பாடி பழனிசாமி அந்த நாற்காலியில் உட்கார்ந்தார்.   இதில் ஒரு வேடிக்கை என்னவென்றால் தனக்கு வந்த வாய்ப்பு பறி போன பின்னரும்கூட, எடப்பாடி பழனிசாமி முதலமைச்சராக தேர்ந்தெடுக்கப்பட்டார் என்கிற செய்தியை கட்சியின் சீனியர் என்கிற முறையில், கூவத்தூரில் செய்தியாளர்கள் மத்தியில் அறிவித்ததே செங்கோட்டையன் தான்.  அதற்கு நன்றிக்கடனாக தனது அமைச்சரவையில் செங்கோட்டையனை அமைச்சராக்கினார் பழனிசாமி.

அடுத்த ஆட்டம்:

அதிமுகவில் ஒருங்கிணைப்பு கோரி வெளியே இருந்தும் குரல்கள் வந்த நிலையில் உள்ளே இருந்து குரல் கொடுத்துக் கொண்டே இருந்தார் செங்கோட்டையன்.  இதில் அதிருப்தி அடைந்த எடப்பாடி பழனிசாமியை செங்கோட்டையனின் கட்சி பொறுப்புகளை பறித்து அவரின் சிறகுகளை வெட்டி வைத்தார்.  அதன் பின்னரும் ஒருங்கிணைப்பு கோரி அதிமுகவில் இருந்து விலக்கப்பட்ட ஓ.பன்னீர்செல்வம், டிடிவி தினகரனும் கைகோர்த்ததால் அதிமுகவில் இருந்து செங்கோட்டையனை நீக்கினார் எடப்பாடி பழனிசாமி. 

இதனால் வேறு வழியின்றி விஜயை சந்தித்து பேசி தவெகவில் இணைந்துள்ளார் செங்கோட்டையன். அவர் மட்டுமல்லாது அதிமுகவில் இருந்து நீக்கப்பட்ட அவரது ஆதரவாளர்களும் தவெகவில் இணைந்துள்ளனர். பனையூர் தவெக தலைமை அலுவலகத்தில் நடந்த இந்த  இணைப்பு நிகழ்ச்சிக்கு பின்னர், ’’செங்கோட்டையனின் அரசியல் அனுபவமும், களப்பணியும் தவெகவுக்கு உறுதுணையாக அமையும் ’’என்று நம்பிக்கை தெரிவித்து விஜய் வீடியோ வெளியிட்டுள்ளார்.

அதிமுகவுடன் கூட்டணிக்கு வருமா தவெக? என்று கொக்கு மாதிரி ஒற்றைக்காலில் காத்துக்கிடக்கும் எடப்பாடி பழனிசாமியை வீழ்த்த செங்கோட்டையன் எடுத்த ஆயுதம் இது என்ற பேச்சு எழுந்திருக்கிறது.

எழுத்து : கதிரவன்

About the Author