அதிமுகவில் இருந்து நீக்கப்பட்ட அக்கட்சியின் சீனியரும் முன்னாள் அமைச்சருமான செங்கோட்டையன் தவெகவில் இணைந்து மாநில மற்றும் மாவட்ட அளவில் இரண்டு பொறுப்புகளை பெற்றிருக்கிறார். செங்கோட்டையன் தவெகவில் இணைந்ததன் பின்னணியில் பாஜக உள்ளது என்ற விமர்சனம் எழுந்திருக்கிறது. தவெகவும் இப்போது பாஜகவுடன் இணக்கம் காட்டுகிறது என்கிற விமர்சனம் எழுந்திருக்கிறது. ஒரு காலத்தில் பாஜகவின் ஸ்லீப்பர் செல்லாக இயங்கிவந்த விஜய் இப்போது நேரடியாக களமிறங்கி இருக்கிறார் என்கிற விமர்சனங்கள் வலுக்கின்றன. அதே போன்று பாஜகவின் ஸ்லீப்பர் செல் செங்கோட்டையன். பாஜகவின் வேலைகளை நிறைவேற்றுவதற்காகத்தான் அவர் தவெகவில் இணைந்துள்ளார் என்கின்ற விமர்சனங்களும் வலுக்கின்றன.
இது குறித்து செய்தியாளர்களுக்கு அளித்த நேர்காணலில் விசிக தலைவர் திருமாளவன் பதில்:
’’எந்த பின்னணியில் செங்கோட்டையன் தவெகவில் இணைந்தார் என்பது பற்றி எனக்கு தெரியாது. ஆனால் தமிழ்நாட்டில் நடக்கின்ற அரசியல் நகர்வுகளில் ஒவ்வொரு அங்குலத்திலும் பாரதிய ஜனதாவின் கைகள் உள்ளன. இதை யாரும் மறுக்க முடியாது.
அதிமுகவில் இன்றைக்கு உள்ள குழப்பமான நிலைக்கு, விமர்சிக்கப்படும் நிலைக்கு பாஜகவும் ஒரு காரணம் என்பதை அதிமுக தலைவர்கள் உணர்வார்கள் என்று நான் நம்புகிறேன்.
தமிழ்நாட்டை குறிவைத்து பாஜக உள்ளிட்ட சங்பரிவார்கள் அரசியல் நகர்வுகளை மேற்கொண்டு வருகிறார்கள். இந்தச் சூழலில் தமிழ்நாட்டு மக்கள் விழிப்பாக இருக்க வேண்டும் என்பது மட்டும் என்னுடைய வேண்டுகோள்.
தமிழக வெற்றிக்கழகம் தனித்துவத்தோடு இயங்குகிறது என்கிற நம்பிக்கையை தமிழ்நாட்டு மக்களிடையே பெற்றால்தான் தமிழ்நாட்டு மக்கள் அந்த கட்சியின் மீது ஒரு நம்பிக்கையைப் பெறுவார்கள். அவ்வாறு இல்லாமல் அது பாரதிய ஜனதாவோடு இணக்கமாக இருக்கிறது , நெருக்கமாக இருக்கிறது என்ற தோற்றம் உருவானால் அவர்களுக்கு எந்த அளவுக்கு அது சாதகமாக இருக்கும் என்று எனக்குத் தெரியவில்லை. தமிழ்நாட்டு மக்களைப் பொறுத்தவரையிலும் எதிராகத்தான் பார்ப்பார்கள்.
இந்தியாவில் வேறு எந்த மாநிலத்திலும் இல்லாத ஒரு அரசியல் பாஜகவோடு உறவு வைத்துக்கொள்கிற அணுகுமுறை சீர்தூக்கிப்பார்க்கிற , அது மக்களுக்கு எதிரானது என்று கருதுகிற பார்வை தமிழக மக்களிடத்தில் மேலோங்கி இருக்கிறது. அந்த வகையில் பார்க்கின்றபோது, பாஜகவோடு நெருக்கம் , இணக்கம் தவெக காட்டினால் அது எத்தகைய தாக்கத்தை ஏற்படுத்தும் என்பதை அவர்கள்தான் சீராய்வு செய்து பார்க்க வேண்டும்.
விஜய் மீது எனக்கு நல்ல மதிப்புண்டு. அவர் அரசியலுக்கு வந்ததை முதன் முதலில் வரவேற்றவன் நான். ஆனால் அவர் தனித்துவமாக இயங்க வேண்டும் என்பது என்னுடைய அவா. இப்போது நடக்கின்ற நிகழ்வுகளை எல்லாம் பார்க்கின்ற போது, அவ்வாறு அவர் இயங்கவில்லையோ என்கிற சந்தேகத்தை எழுப்புகிறது. இந்த சந்தேகம் எனக்கு மட்டுமல்ல பொதுமக்களிடத்திலும் உள்ளது.
நல்லது கெட்டதை அவர்தான் தீர்மானிக்க வேண்டும். என்னைப் பொறுத்தைவரையிலும் பாஜகவோடு அவர் காட்டுகிற இணக்கம், அணுகுமுறை கூட அவருக்கு பயன்தருவதாக அமையாது என்பது என்னுடைய கருத்து’’.
About the Author
