அதிமுக முன்னாள் அமைச்சர் செங்கோட்டையன் நேற்று தவெகவில் இணைந்தார். அதன்பின்னர், செங்கோட்டையனை அடுத்து ஜெயக்குமாரா? என்ற கேள்வி எழுந்திருக்கிறது.
இதற்கு ஜெயக்குமார் செய்தியாளர்களை சந்தித்து விளக்கம் கொடுத்துள்ளார்.
செங்கோட்டையன் தவெகவில் இணைந்தது குறித்து கேள்விக்கு, ‘’நான் பெரிதும் மதிக்கூடியவர் அண்ணன் செங்கோட்டையன். அவர் ஒரு முடிவு எடுத்து தவெகவில் இணைந்திருக்கிறார். எங்கிருந்தாலும் வாழ்க. இதைத்தான் நான் சொல்ல முடியும். அவர் தவெகவில் இணைந்ததுமே செங்கோட்டையனை அடுத்து ஜெயக்குமாரும் போகிறார் என்று தகவல் பரப்புகிறார்கள். நடக்காது கண்ணா நடக்காது. எவ்வளவு வேண்டுமானாலும் கை வலிக்க எழுதிக்கொள்ளுங்கள்’’ என்றார்.
தொடர்ந்து பேசிய ஜெயக்குமார், ‘’என்னைப்பொறுத்தவரையிலும் ஒரே கட்சிதான். நேற்று இன்று நாளை. எனது இறுதிக்காலம் வரை அதிமுகவில்தான் இருப்பேன். செத்தாலும் இறுதிச்சடங்கில் அதிமுக கொடியோடுதான் போவேனே தவிர, யார் வீட்டு வாசலிலும் போய் நின்று கதவை தட்டமாட்டேன்.
புலிக்கு வாலாக இருப்பதில் எனக்கு சம்மதம். ஆனால் எலிக்கு தலையாக இருக்க விருப்பமில்லை. எலிக்கு தலையாக இருந்தாலும் எந்த பிரயோசனமும் இருக்கக்கப் போவதில்லை. புலி என்பது அதிமுக. அடுத்து எலி என்றால் எந்த கட்சி என்பதை நீங்களே யூகித்துக் கொள்ளுங்கள்.’
சபாநாயகர், நிதி அமைச்சர், 15க்கும் மேற்பட துறைகள், கட்சியில் பல பொறுப்புகள். இதெல்லாம் எவ்வளவு பெருமைகள். இத்தனையும் அதிமுகவில் எனக்கு கிடைத்திருக்கிறது. அதனால் காலம் முழுவதும் புரட்சித்தலைவர் புகழ்பாடுவேன்’’என்றார்.
About the Author
