நாம் அனைவரும் தங்கத்தை ஒரு பொன்னான உலோகம் மின்னும் ஆபரணம் என்று தானே நினைத்துக்கொண்டுள்ளோம். திருமண நகைகள், கோயில் தெய்வச் சிலைகள், பரிசுகள் என எதிலும் தங்கம் (Gold) மனிதர்களின் வாழ்வில் ஒரு தனி இடத்தை எப்போதுமே பிடித்திருக்கிறது. ஆனால் நீங்கள் அணியும் அந்த நகைகள் உங்கள் விரலில் ஜொலிக்கும் அந்த மோதிரம் பூமியில் உருவானதல்ல என்பதை நீங்கள் எண்ணிப் பார்த்ததுண்டா?
“தங்கத்தின் பிறப்பிடம் பூமி அல்ல…அது விண்வெளி!”
இந்த ஒரு உண்மைதான் தங்கத்தை ஒரு உலோகம் என்ற வரம்பை மீறி ஒரு ‘காஸ்மிக் கதாபாத்திரமாக’ மாற்றுகிறது.
தங்கத்தின் காஸ்மிக் கதையின் தொடக்கம்
பிரபஞ்சத்தின் பிறப்புக்குப் பிறகு, முதல் சில நிமிடங்களில் ஹைட்ரஜன், ஹீலியம் போன்ற எளிய மூலக்கூறுகள் உருவானது. ஆனால் தங்கம் போன்ற கனமான மூலக்கூறுகளை உருவாக்க தேவையான சக்தி சாதாரண நட்சத்திரங்களிலும் கிடையாது.
அதற்கு அதீதமான அழுத்தமும், மாபெரும் வெடிப்பும், பயங்கரமான காந்தப் புயல்களும் தேவை.
இதற்கான மிக சக்திவாய்ந்த உலை எது தெரியுமா?
நியூட்ரான் நட்சத்திர மோதல் (Neutron Star Collision) இது பிரபஞ்சத்தில் நிகழும் எக்ஸ்ட்ரீம் சக்தியின் உச்சமாகக் கருதப்படும் நிகழ்வு. இரு நியூட்ரான் நட்சத்திரங்கள் ஒவ்வொன்றும் ஒரு சூரியனை விட கனமானவை.
அவை ஒன்றோடொன்று ஈர்க்கப்பட்டு மோதும் அந்த நொடியில் பிரபஞ்சம் “கிலோநோவா” எனப்படும் ஒரு மாபெரும் வெடிப்பை ஏற்படுத்துகிறது.
அந்த வெடிப்பால் உருவாகும் ஆர்–செயல்முறை (R-process) என்ற அணுக்கரு இணைப்பு செயலே, தங்கம், பிளாட்டினம், யூரேனியம் போன்ற கன உலோகங்களை உருவாக்குகிறது.
2017-ம் ஆண்டு LIGO மற்றும் Virgo என்னும் ஆராய்ச்சி மையங்கள் முதன்முறையாக இத்தகைய மோதலின் ஈர்ப்பு அலைகளை கண்டறிந்து, அதில் தங்கத்தின் சுவடுகள் இருப்பதை உறுதிசெய்தன. இதுவே “நட்சத்திர மோதல் கோட்பாடு” உண்மையென நிரூபித்தது.
ஆனால் அதற்கு முன்பே உருவான நட்சத்திரங்களில் தங்கம் எப்படி இருந்தது?
இந்த கேள்வியே விஞ்ஞானிகளை பல ஆண்டுகள் குழப்பியது. நியூட்ரான் நட்சத்திர மோதல்கள் பிரபஞ்ச வரலாற்றில் மிகவும் தாமதமாக நடந்தவை. ஆனால் மிகவும் பழைய கலைக்ஸிகளில் கூட தங்கத்தின் தடயங்கள் இருந்தன.
இதற்கான பதில் இப்போது 2025-ல் கிடைத்தது.
கொலம்பியா பல்கலைக்கழக விஞ்ஞானிகள் ஒரு புதிய கண்டுபிடிப்பு வெளியிட்டனர்; அதில்,
மேக்னட்டார் (Magnetar) வெடிப்புகள் கூட தங்கத்தை உருவாக்க கூடிய சக்தி படைத்தவை. மேக்னட்டார் என்பது மிக அதிக காந்த சக்தி கொண்ட நியூட்ரான் நட்சத்திரமாகும். பூமியின் காந்தத்தைக் காட்டிலும் 100,000 கோடி மடங்கு சக்தி கொண்டது.
அவற்றில் ஏற்படும் ‘நட்சத்திர நிலநடுக்கம்’ (Starquakes) போன்ற திடீர் வெடிப்புகள்நிகழ்கின்றன. சில மில்லி விநாடிகளில் சூரியன் பல ஆயிரம் ஆண்டுகள் வெளியிடும் ஆற்றலை விட அதிக சக்தியை உமிழ்கின்றன.
இந்த வெடிப்பிலும் ஆர்-செயல்முறை நடைபெற முடியும் என்பதை கண்டுபிடித்ததுதான் 2025ல் தங்கத்தின் ஆரம்ப வரலாற்றை புரிந்துகொள்ளும் மிகப்பெரும் புரட்சி ஏற்பட்டது.
தங்கம் எப்படி பூமிக்கு வந்தது?
பூமி உருவானது 4.5 பில்லியன் (450 கோடி) ஆண்டுகளுக்கு முன். அப்போது பூமி உருகிய பந்தாக இருந்ததால், கனமான தங்கம் போன்ற உலோகங்கள் நேராக பூமியின் மையத்திற்கே சென்று புதைந்துவிட்டன. அதை நம்மால் எடுக்க முடியாது.
அப்படியிருக்க… நம்மிடம் இப்போது தங்கம் எங்கே இருந்து வந்தது?
- Late Heavy Bombardment — விண்கற்கள் மழை!
- சுமார் 4.1 பில்லியன் ஆண்டுகளுக்கு முன், சூரிய குடும்பத்தில் கோள்கள் நிலைபெறும் போது
- மாபெரும் விண்கற்கள் மழையாக பூமியை தாக்கின.
- இந்த விண்கற்கள்தான் தங்கத்தின் ‘ஸ்பெஷல் டெலிவரி’.
- இந்த விண்கற்களில் பிரபஞ்சத்தில் உருவான தங்க அணுக்கள் இருந்தன.
அவை பூமியின் மேற்பரப்பில் படிந்து, பின்னர் எரிமலை வெப்பம், ஹைட்ரோத்தெர்மல் நீர்மங்கள், பூமியின் பிளவுகள் இவற்றின் வழியாக பாறைகளுக்குள் சென்றது.
காலப்போக்கில் அவை குளிர்ந்து, தங்க நரம்புகள் (Gold veins) மற்றும் தங்கத் தேக்கங்கள் (Deposits) ஆக மாறின. இன்றும் நாம் சுரங்கங்களில் வெட்டி எடுப்பது அந்தக் காலத்தில் விழுந்த விண்கற்கள் கொண்டு வந்த தங்கமே.
அறிவியல் ஏற்றுக்கொள்ளும் தங்கத்தின் சுவாரஸ்யமான உண்மைகள்
- பல பழைய கலைகளிலும் தங்கம் இருப்பது, கன உலோகங்கள் பிரபஞ்சம் உருவான சில நூறு மில்லியன் ஆண்டுகளுக்குள் உருவானதைக் காட்டுகிறது.
- காற்றோ, நீரோ, சூட்டோ, குளிரோ எந்தவையும் அதை அழிக்க முடியாத விசித்திரமான உலோகம் தான் தங்கம் .
- பூமியில் உள்ள தங்கத்தை முழுவதும் உருக்கினால், அது முழு பூமியை மூடியே விடும் என்பதை விஞ்ஞானிகள் கணக்கிட்டுள்ளனர். ஆனால் தங்கத்தின் மிகக் குறைந்த கிடைக்கும்தன்மையே அதை அதிக மதிப்புமிக்கதாக மாற்றுகிறது.
- ஒவ்வொரு நபருக்கும் சராசரியாக பூமியில் 0.2 மில்லிகிராம் தங்கமே கிடைக்கும்; அதற்கு மேல் நாம் பெறும் தங்கம் அனைத்தும் சுரங்கங்களில் கிடைக்கும் அரிதான தங்கத் தேக்கங்களில் இருந்து தான்.
- தங்க அணுக்கள் உருவாகும் போது, அவற்றுடன் இணைந்து பிளாட்டினம், ஒஸ்மியம், ரோடியம் போன்ற மிகவும் அரிதான உலோகங்களும் உருவாகின்றன.
நீங்கள் அணியும் தங்க நகை ஒரு நட்சத்திரத்தின் உடல்!
அடுத்த முறை நீங்கள் ஒரு தங்க மோதிரத்தை அணிந்தால், அதன் ஒவ்வொரு அணுவும், நீங்கள் தொடும் ஒவ்வொரு கரத்துத் துகளும் ஒரு நட்சத்திர வெடிப்பில் பிறந்தது என எண்ணுங்கள். பிரபஞ்சம் முழுவதும் பயணம் செய்து பூமிக்கு வந்து சேர்ந்தது, கோடிக்கணக்கான ஆண்டுகள் பாறைகளில் உறங்கிக் கொண்டிருந்தது, அதனை மனிதர்கள் எடுத்தனர். அது இன்று உங்கள் கைகளில் ஜொலிக்கிறது. நாம் அணியும் தங்கம் என்பது வெறும் உலோகம் மட்டும் அல்ல. அது நம்மை உருவாக்கிய பிரபஞ்சத்தோடு நேரடியான தொடர்பை கொண்ட ஒரு “காஸ்மிக் ரத்தம்”. அதுவே தங்கத்தை இன்றும் உலகின் மிக மதிப்புமிக்க பொருளாக மாற்றுகிறது.
About the Author
