அதிமுக முன்னாள் அமைச்சர் செங்கோட்டையன் நேற்று தனது ஆதரவாளர்களுடன் சென்னை பனையூரில் உள்ள தவெக தலைமை அலுவலகம் சென்று விஜயை சந்தித்து அக்கட்சியில் இணைந்தார்.
தவெகவில் இணைந்த மாநில மற்றும் மாவட்ட பொறுப்புகள் வழங்கினார் விஜய். தவெக நிர்வாகக்குழு தலைமை ஒருங்கிணைப்பாளர் பொறுப்பு மற்றும் ஈரோடு, கோவை, திருப்பூர், நீலகிரி மாவட்டங்களின் அமைப்புச் செயலாளர் பொறுப்பினை பெற்றுக்கொண்ட செங்கோட்டையன் இன்று ஈரோடு திரும்பினார்.
முன்னதாக கோவை விமான நிலையத்தில் தவெக தொண்டர்கள் மற்றும் நிர்வாகிகள் செங்கோட்டையனுக்கு வரவேற்பு அளித்தனர். அதன் பின்னர் செங்கோட்டையன் செய்தியாளர்களை சந்தித்து பேட்டி அளித்தார்.
பேட்டியில் அவர், ‘’2026ல் தமிழ்நாட்டின் முதல்வராக விஜய் வருவார். எம்.ஜி.ஆரின் அண்ணாயிசம்தான் விஜயின் கொள்கை. ஆண்டுக்கு 500 கோடி ரூபாய் வருமானத்தை உதறிவிட்டு கட்சிக்கு வந்துள்ளார். எம்.ஜி.ஆர்., ஜெயலலிதாவுக்கு பிறகு மூன்றாவது தலைவராக விஜயை ஆட்சிக்கட்டிலில் அமரவைக்க பாடுபடுவோம்’’என்றார்.
ஈரோடு மாவட்டம் கோபிசெட்டிபாளையத்தில் 8 முறை எம்.எல்.ஏவாக இருந்து வரும் செங்கோட்டையன் தவெகவுக்கு சென்றுவிட்டாலும் அதிமுக வாக்கு வங்கி தன் பின்னால்தான் உள்ளது என்று சொல்லி வருவதற்கு பதிலடி கொடுத்தார் செங்கோட்டையன்.
’’என்னைப் பொறுத்தவரையிலும் 9 முறை சட்டமன்ற உறுப்பினராக இருக்கிறேன். எனக்கு பின்னால் மக்கள் இருக்கிறார்கள் என்று அவர்(பழனிசாமி) சொல்லலாமே தவிர, மக்கள் அதை பார்த்துக் கொள்வார்கள். 3 முறை வாக்கே கேட்காமல் என்னை வெற்றி பெற வைத்த மக்கள் அங்கே இருக்கிறார்கள். யார் வேண்டுமானாலும் எதை வேண்டுமானாலும் சொல்லலாம். ஒன்றை மட்டும் சொல்லிக்கொள்கிறேன்.. நான் என்று ஒருவன் நினைத்தால் ஆண்டவன் ‘தான்’ என்று காட்டிவிடுவான்’’ என்றார் செங்கோட்டையன்.
About the Author
