கொங்குமண்டலத்தில் அதிலும் குறிப்பாக ஈரோட்டில் தனக்கென தனி செல்வாக்கை தக்க வைத்திருக்கும் அதிமுக முன்னாள் அமைச்சர் செங்கோட்டையன், தனது ஆதரவாளர்கள் 100 பேருடன் தவெகவில் இணைந்தார்.
அதன்பின்னர் அவர் பேசும் ஒவ்வொரு பேச்சிலும் அதிமுகவில் இருந்து தன்னை வெளியேற்றிய பழனிசாமியை வீழ்த்துவதென்று கங்கனம் கட்டிக்கொண்டு நிற்பது தெரிகிறது.
செங்கோட்டையனுடன் 2 முன்னாள் எம்.எல்.ஏக்கள், 1 முன்னாள் எம்.பி. ஆகியோர் தவெகவில் இணைந்திருந்தனர். பழனிசாமியால் அதிருப்தியில் இருக்கும் மாஜி அமைச்சர்கள் பலரும் செங்கோட்டையனிடம் புலம்பி வருகின்றனர். அவர்களை எல்லாம் தவெகவுக்கு அழைத்து வர ஏற்பாடுகள் செய்து வருகிறார் செங்கோட்டையன்.
தவிர அமமுகவை தவெக கூட்டணிக்குள் கொண்டு வந்துவிடவும், ஓ.பன்னீர்செல்வத்தை தவெகவில் கொண்டு வந்துவிடவும் தீவிர முயற்சிகள் எடுத்து வருகிறார்.
அதனால்தான் அவ்வளவு அழுத்தமாக கோபி செட்டிபாளையத்தில் ஆதவாளர்கள் மத்தியில் பேசும்போது, ‘’நம்பிக்கையோடு இருங்கள். டிசம்பரில் கூட்டணி பலமாக அமையும். மாஜி அமைச்சர்கள் பலர் தவெகவில் வர இருக்கிறார்கள்’’ என்றார்.
இதையடுத்து அந்த மாஜி அமைச்சர்கள் யார்? யார்? என்ற சலசலப்பு எழுந்திருக்கிறது. ஜெயக்குமாரா? என்ற சலசலப்புக்கு அவர் மறுத்திருக்கிறார். பொள்ளாச்சி ஜெயராமனா? என்ற சலசலப்புக்கும் அவரே மறுத்திருக்கிறார். இதன்பின்னர் டெல்டா மாவட்டத்திலும் தென் மாவட்டத்திலும் உள்ள மாஜிக்கள் பெயர் அடிபடுகிறது. அவர்களை சரிகட்டும் வேலைகளில் மும்முரம் காட்டி வருகிறார் செங்கோட்டையன் என்கிறது தவெக தரப்பு.
About the Author
