இயக்குநர் ஏஆர் முருகதாஸ் இயக்கத்தில் பாலிவுட் சூப்பர்ஸ்டார் சல்மான் கான் நடிக்கவுள்ளதாக அதிகாரப்பூர்வமாக அறிவிப்பு வெளியாகியுள்ளது.
தீனா, ரமணா, கஜினி உள்ளிட்ட படங்களை இயக்கியதன் மூலம் தமிழ் சினிமாவின் முன்னணி இயக்குநராக வலம் வருபவர் ஏ.ஆர்.முருகதாஸ்.
தமிழ் திரையுலகைத் தொடர்ந்து, தெலுங்கு சினிமாவில் சிரஞ்சீவி நடிப்பில் வெளியான ஸ்டாலின் திரைப்படத்தை ஏ.ஆர்.முருகதாஸ் இயக்கினார்.
கஜினி படத்தை பாலிவுட் திரையுலகின் உச்ச நட்சத்திரமான அமீர் கானை வைத்து ஏ.ஆர்.முருகதாஸ் இந்தியில் ரீமேக் செய்ய, அது இந்திய சினிமாவில் முதல்முறையாக ரூ.100 கோடி வசூல் செய்து சாதனை படைத்தது.
இதன் மூலம் இந்திய சினிமாவில் முக்கியமான இயக்குநராக மாறினார் ஏ.ஆர்.முருகதாஸ். அதன்பின், சூர்யா நடிப்பில் வெளியான 7ஆம் அறிவு, விஜய் நடிப்பில் வெளியான துப்பாக்கி ஆகிய படங்கள் வசூல் சாதனை படைத்தன.
தற்போது சிவகார்த்திகேயன் நடிப்பில் ஏ.ஆர்.முருகதாஸ் புதிய படத்தை இயக்கி வருகிறார்.
இந்த சூழலில், பாலிவுட் சூப்பர்ஸ்டார் சல்மான் கான் நடிக்கவுள்ள புதிய படத்தை ஏ.ஆர்.முருகதாஸ் இயக்கவுள்ளதாக அறிவிக்கப்பட்டுள்ளது.
சாஜித் நடியத்வாலா தயாரிக்கவுள்ள இந்த திரைப்படம் 2025-ம் ஆண்டு ரமலானுக்கு வெளியாகும் என்றும் அறிவிக்கப்பட்டுள்ளது.
அஜித்குமார் நடித்த பில்லா, ஆரம்பம் படத்தை இயக்கிய விஷ்ணு வர்தன் இயக்கத்தில் ‘தி புல்’ படத்தில் நடிக்கவுள்ள சல்மான் கான், மற்றொரு தமிழ் இயக்குநர் படத்திற்கு ஓகே கூறியுள்ளது ரசிகர்களிடையே ஆச்சரியத்தையும் எதிர்பார்ப்பையும் எழுப்பியுள்ளது.
About the Author
