உலகம் முழுவதும் இன்று ஆயிரக்கணக்கான பயணிகள் எதிர்கொண்ட மிகப்பெரிய சிக்கல், மோசமான வானிலை, பனிப்புயல், மழை அல்லது இயந்திரக் கோளாறு காரணமாக அல்ல. மிகவும் அபூர்வமாக ஏற்படும் சூரிய கதிர்வீச்சின் தாக்கம் தான் இந்த தடங்கலுக்கான முக்கிய காரணமாக இருக்கிறது.
ஏர்பஸ் (Air Bus) நிறுவனத்தின் A320 ரக விமானங்களில் கண்டறியப்பட்ட தொழில்நுட்பப் பிழையால், பல நாடுகளில் விமானப் போக்குவரத்து தற்காலிகமாக பாதிக்கப்பட்டுள்ளது.
A320 விமானங்களில் என்ன பிரச்னை?
ஐரோப்பாவைச் சேர்ந்த ஏர்பஸ் நிறுவனம் தயாரித்த A320 என்பது உலகம் முழுவதும் மிக அதிகமாக பயன்படுத்தப்படும் பயணிகள் விமான வகைகளில் ஒன்றாகும். A320 குடும்பத்தில் உள்ள A318, A319, A320, A321 ஆகிய மாடல்களும் உலகப் பயணிகள் போக்குவரத்தில் முக்கிய பங்காற்றுகின்றன.
இந்த விமானங்களில் பயன்படுத்தப்படும் உயரம் கணக்கிடும் கணினி மென்பொருள் (Altitude calculation software) சூரிய கதிர்வீச்சின் தாக்கத்தால் பாதுகாப்பான செயல்பாட்டை இழக்கும் அபாயம் உள்ளது என்று ஏர்பஸ் நிறுவனம் கண்டறிந்துள்ளது.
மிகுந்த உயரத்தில் பறக்கும் போது, சூரியனில் இருந்து வரும் கடுமையான radiation காரணமாக சில கணினி தரவுகள் அழிந்து போக வாய்ப்பு உள்ளது. இதுவே விமானம் திடீரென உயரம் குறைவாக பறப்பதற்கும், உண்மையான உயரம் மற்றும் கணினி காட்டும் உயரம் வேறுபடுவதற்கும் காரணமாக இருக்கலாம்.
A320 ரக விமானங்கள் “fly-by-wire” தொழில்நுட்பத்தில் இயங்குகின்றன. இதில் பைலட் கட்டுப்படுத்தும் அனைத்து செயல்பாடுகளும் முழுவதும் கணினி மூலமே விமானத்தின் இயக்க அமைப்புகளுக்கு அனுப்பப்படும். இதன் பொருள், கணினி பிழை ஏற்பட்டால், விமானத்தின் கட்டுப்பாடு itself பாதிக்கப்படும்.
எப்படி பிரச்னை கண்டறியப்பட்டது
இந்த கோளாறு முதலில் வெளிப்பட்டது கடந்த அக்டோபரில். மெக்சிகோவிலிருந்து அமெரிக்காவுக்கு புறப்பட்ட ஜெட் ப்ளூ விமானம் திடீரென உயரத்தை இழந்தது. இச்சம்பவத்தில் 15 பேர் காயமடைந்தனர்.
பின்னர் நடைபெற்ற விசாரணையில், சூரிய கதிர்வீச்சு காரணமாக விமான கணினியில் உள்ள டேட்டா திடீரென பழுதடைந்திருக்கலாம் என்று நிபுணர்கள் தெரிவித்தனர். இதே நேரத்தில் பல்வேறு A320 விமானங்களில் ஒரே மாதிரி தரவு பிழைகள் இருப்பது தெரிய வந்ததால், ஏர்பஸ் நிறுவனம் இதை ஒரு பரவலான பாதுகாப்பு பிரச்னை என அறிவித்தது.
எத்தனை விமானங்கள் பாதிப்பு?
ஏர்பஸ் நிறுவனத்தின்கணக்கின் படி: மொத்தம் 6000 க்கும் மேற்பட்ட A320 குடும்ப விமானங்கள் உலகம் முழுவதும் பயன்பாட்டில் உள்ளன. இதில் 5100 விமானங்களில் மென்பொருள் அப்டேட் செய்தாலே, சுமார் மூன்று மணி நேரத்தில் பிரச்னை தீர்ந்து விடும். ஆனால் 900 பழைய மாடல் விமானங்களில் முழு கணினி அமைப்பு மாற்றப்பட வேண்டும்.
இதற்கு எவ்வளவு நேரம் ஆகும் என்பது புதிய கணினிகள் எப்போது கிடைக்கிறது என்பதையே பொறுத்தது. இந்த நேரம் வரை அவை பறக்க அனுமதி இல்லை.
ஐரோப்பிய ஒன்றியத்தின் அவசர அறிவுறுத்தல்
ஐரோப்பிய ஒன்றிய விமானப் பாதுகாப்பு நிறுவனம் (EASA) இந்த பிரச்னை குறித்து உடனடியாக அவசர எச்சரிக்கை ஒன்றை வெளியிட்டுள்ளது. “பிரச்னை சரியாகும் வரை பயணிகளை ஏற்றக்கூடாது” — EASA
இதனால் பல விமான நிறுவனங்கள் தங்களின் விமான அட்டவணைகளை மாற்றி அமைக்க வேண்டி உள்ளது.
எந்தெந்த விமான சேவைகள் பாதிக்கப்பட்டுள்ளன?
A320 குடும்பத்தை அதிகமாகப் பயன்படுத்தும் நாடுகள் மற்றும் விமான நிறுவனங்களில் சேவை தடங்கல் ஏற்பட்டுள்ளது. முக்கியமானவை:
அமெரிக்க விமான நிறுவனங்கள்
- அமெரிக்கன் ஏர்லைன்ஸ் – 340 விமானங்கள் பாதிக்கப்பட்டுள்ளது.
- டெல்டா, ஜெட் ப்ளூ, யூனைடெட் ஏர்லைன்ஸ் என பல விமானங்களும் தாமதம் மற்றும் ரத்து செய்யப்பட்டுள்ளது.
- ஐரோப்பா ஏர் பிரான்ஸ் பாரிசில் இருந்து புறப்படும் 50 விமானங்கள் ரத்து
- பிரிட்டிஷ் ஏர்வேஸ் குறைவான பாதிப்பு ஏற்பட்டுள்ளது.
- விஸ் ஏர் – மென்பொருள் அப்டேட் தொடங்கியது
- ஆசியா, இந்தியா, ஏர் இந்தியா விமானங்களில் அப்டேட் பணிகள் தொடங்கப்பட்டுள்ளன.
- இண்டிகோ – சில விமானங்களின் நேரம் மாற்றப்படும் என அறிவிப்பு
- ஜப்பான் – பல உள்ளூர் சேவைகள் பாதிப்பு. ஆஸ்திரேலியா, ஜெட்ஸ்டார் 90 விமானங்கள் ரத்து செய்யப்பட்டுள்ளன.
ஏர்பஸ் நிறுவனத்தின் பதில்
ஏர்பஸ் நிறுவனம் உலகம் முழுவதும் ஏற்பட்டுள்ள இந்த தடங்கலுக்கு நேரடியாக மன்னிப்பு கேட்டுள்ளது. தொழில்நுட்பக் கோளாறு இருப்பதால் பாதுகாப்பு முதன்மை என்பதையும், விமானங்களை சரிசெய்யும் பணிகள் வேகமாக நடைபெறுவதாகவும் தெரிவித்துள்ளது.
சூரிய கதிர்வீச்சு உண்மையில் இத்தனை ஆபத்தானதா?
- சூரியனில் இருந்து வரும் Radiation சில நேரங்களில், செயற்கைக்கோள்களின் செயல்பாடுகளை பாதிக்கும்
- ஜிபிஎஸ் சிக்னல்களில் பிழை ஏற்படுத்தும்
- உயர் உயரத்தில் பறக்கும் விமானங்களில் உள்ள மின்னணு கருவிகளில் தற்காலிக தடங்கல்கள் ஏற்படுத்தலாம்
- இத்தகைய மிகுந்த கதிர்வீச்சு அதிகமாக ஏற்படும் நாட்களில், விமானங்களின் குறிப்பிட்ட கணினி பகுதிகளில் தரவு சேதமடைவது ஒரு பெரிய பாதுகாப்பு சிக்கலாக மாறும்.
சூரிய கதிர்வீச்சால் விமானக் கணினியில் ஏற்படும் பிழை காரணமாக, உலகம் முழுவதும் பயன்படுத்தப்படும் A320 ரக விமானங்களில் பெரிய தொழில்நுட்பப் பிரச்னை ஏற்பட்டுள்ளது. இதை சரிசெய்ய ஏர்பஸ் மற்றும் பல விமான நிறுவனங்கள் வேகமாக வேலை செய்து வருகின்றன.
பாதுகாப்பு நிலைமை சரியாகும் வரை சில விமான சேவைகள் தற்காலிகமாக பாதிக்கப்படுவது தவிர்க்க முடியாதது. இதுவே விமான உலகில் ஒரு அபூர்வமான, ஆனால் முக்கியமான அறிவியல் மற்றும் தொழில்நுட்ப சம்பவமாக பார்க்கப்படுகிறது.
About the Author
