நீண்ட இடைவேளைக்கு பின்னர் மீண்டும் கார் பந்தயக்களம் புகுந்திருக்கிறார் நடிகர் அஜித்குமார். அடுத்த ஆண்டில் நடைபெற உள்ள 24H Dubai 2025 & The European 24H Series Championship – Porsche 992 GT3 Cup Class கார் பந்தயங்களில் பங்கேற்க உள்ளார் அஜித்.
இதற்காக அவர் ரேஸ் டிராக்கில் டெஸ்ட் டிரைவிங்கில் உள்ளார். அது குறித்த போட்டோக்கள் வைரலாகி வருகின்றன. அஜித்குமார் ரேசிங் என்கிற காரிலும், அஜித் அணிந்திருக்கும் ஹெல்மெட்டிலும் தமிழ்நாட்டு விளையாட்டு மேம்பாட்டுத்துறையின் லோகோ இடம்பெற்றுள்ளது.
இதனால் தமிழ்நாடு துணைமுதல்வரும், அமைச்சர்கள் அன்பில் மகேஸ், டிஆர்பி ராஜா ஆகியோரும் நன்றி தெரிவித்துள்ளனர்.
துணை முதல்வர் உதயநிதி ஸ்டாலின் தனது எக்ஸ் தள பக்கத்தில், ’’உலக அளவில் சிறப்புக்குரிய 24H Dubai 2025 & The European 24H Series Championship – Porsche 992 GT3 Cup Class கார் பந்தயத்தில் பங்கேற்கவுள்ள நடிகரும், நண்பருமான திரு.அஜித்குமார் சார் அவர்களுக்கு எங்களுடைய மனமார்ந்த வாழ்த்துகளைத் தெரிவித்துக் கொள்கிறோம்’’ என்று பதிவிட்டுள்ளார்.
அவர் மேலும் தனது பதிவில், ‘’நம்முடைய தமிழ்நாடு விளையாட்டு மேம்பாட்டுத்துறை (SDAT) Logo-வை ‘அஜித்குமார் ரேசிங்’ யூனிட்டின், கார், ஹெல்மெட் மற்றும் பந்தயம் தொடர்பான உபகரணங்களில் காட்சிப்படுத்தப்பட்டுள்ளதை அறிந்து மட்டற்ற மகிழ்ச்சி அடைந்தோம். இதன்மூலம், தமிழ்நாடு விளையாட்டு மேம்பாட்டுத்துறையை உலக அரங்கில் பெருமைப்படுத்தி, ஊக்குவித்துள்ள அஜித் சாருக்கு தமிழ்நாடு விளையாட்டு மேம்பாட்டுத்துறையின் சார்பாக எங்களது நன்றியைத் தெரிவித்துக்கொள்கிறோம்’’ என்று குறிப்பிட்டிருக்கிறார்.
முதலமைச்சர் மு.க.ஸ்டாலின் தலைமையிலான அரசு செயல்படுத்தி வரும் பல்வேறு மக்கள் நலத்திட்டங்கள் Formula4 Chennai Racing Street Circuit போன்ற முன்னெடுப்புகளை வாழ்த்திய அஜித் சாருக்கு எங்கள் அன்பும், நன்றியும் என்று தெரிவித்துள்ள துணை முதல்வர், ‘’விளையாட்டுத்துறையில் தமிழ்நாட்டை உலக அரங்கில் உயர்த்திட ஒன்றிணைந்து செயல்படுவோம். கார்பந்தய போட்டியில் வென்று தமிழ்நாட்டுக்கு நீங்கள் பெருமை சேர்த்திட வாழ்த்துகள் அஜித் சார்’’ என்றும் பதிவிட்டிருக்கிறார்.
துணை முதல்வரைத் தொடர்ந்து பள்ளி கல்வித்துறை அமைச்சர் அன்பில் மகேஷும் ‘’நடிகர்-கார் பந்தய வீரர் அஜித்குமார் அவர்களுக்கு வாழ்த்துகள்’’ என்று தனது எக்ஸ் தள பக்கத்தில் தெரிவித்திருக்கிறார்.
’’தமிழ்நாடு விளையாட்டுத்துறை உலகளவில் செல்கிறது. அஜித்தே நன்றி!’’ என்று தனது எக்ஸ் தளத்தில் பதிவிட்டுள்ளார் தொழில்துறை அமைச்சர் டிஆர்பி ராஜா.
About the Author
