ஐ.பி.எல். கிரிக்கெட் தொடரில் நடிகர் ஷாருக்கான் (Shah Rukh Khan) இணை உரிமையாளராக உள்ள கொல்கத்தா நைட் ரைடர்ஸ் அணியில் வங்கதேசத்தைச் சேர்ந்த வேகப்பந்து வீச்சாளர் முஸ்தாபிசுர் ரஹ்மான் சேர்க்கப்பட்டிருப்பது, அரசியல் மற்றும் மத அடிப்படையிலான கடும் விமர்சனங்களை உருவாக்கியுள்ளது. குறிப்பாக வங்கதேசத்தில் இந்துக்கள் மீது தாக்குதல்கள் நடைபெற்று வரும் சூழலில், அந்த நாட்டைச் சேர்ந்த வீரர் இந்திய அணிக்காக விளையாடுவது சரியா என்ற கேள்வியும் ரசிகர்கள் மத்தியில் எழுந்துள்ளது.
அரசியல் தலைவர்கள் மற்றும் மதத் தலைவர்களின் கண்டனம்
இந்த விவகாரம் தொடர்பாக உத்தவ் தாக்கரே தலைமையிலான உத்தவ் சிவசேனா கட்சி (Uddhav Shiv Sena Party) கடும் எதிர்ப்பை தெரிவித்துள்ளது. மேலும், கட்சியின் செய்தித் தொடர்பாளர் ஆனந்த் துபே, வங்கதேச வீரரை ஐ.பி.எல். அணியில் சேர்ப்பது நாட்டின் பாதுகாப்பு தொடர்புடைய விஷயம் என்றும், பாகிஸ்தான் மற்றும் வங்கதேச வீரர்களை ஐ.பி.எல். போட்டிகளில் புறக்கணிக்க வேண்டும் என்றும் கூறியுள்ளார். மேலும், ஷாருக்கான் வங்கதேச வீரரை விளையாட வைத்தால் அதனால் கிடைக்கும் பணம் நாட்டுக்கு எதிரான செயல்களுக்கு பயன்படுத்தப்படலாம் என்றும் அவர் குற்றம் சாட்டினார்.இதுபோல், இந்து சாமியார் ஜகத்குரு ராம்பத்ராச்சார்யாவும் இந்த முடிவை கடுமையாக விமர்சித்துள்ளார். கொல்கத்தா அணியில் வங்கதேச வீரர் சேர்க்கப்பட்டது துரதிருஷ்டவசமானது என்றும், வங்கதேசத்தில் இந்துக்கள் மீது நடைபெறும் தாக்குதல்களை இந்திய அரசு ஒருபோதும் சகித்துக்கொள்ளாது என்றும் அவர் தெரிவித்துள்ளார்.
பா.ஜ.க தலைவர்களின் கடும் விமர்சனம்
இந்த விவகாரத்தில் பா.ஜ.க-வைச் சேர்ந்த பல தலைவர்கள் ஷாருக்கானை கடுமையாக விமர்சித்து வருகின்றனர். குறிப்பாக, வங்கதேசத்தில் இந்துக்கள் கொல்லப்பட்டு வரும் நிலையில், அந்த நாட்டைச் சேர்ந்த வீரரை ரூ.9.20 கோடிக்கு வாங்கியிருப்பது தேச விரோத செயலாகும் என்று அவர்கள் கூறியுள்ளனர். இதனால் இந்தியா–வங்கதேசம் இடையேயான உறவிலும் பதற்றம் அதிகரித்துள்ளது.
எதிர்க்கட்சிகளின் எதிர்வினை
மறுபுறம், இந்த விமர்சனங்களுக்கு எதிராக சில அரசியல் தலைவர்கள் குரல் எழுப்பியுள்ளனர். குறிப்பாக, உத்தரப் பிரதேச சட்டமன்ற எதிர்க்கட்சித் தலைவர் மாதா பிரசாத் பாண்டே, ஷாருக்கான் ஒரு இஸ்லாமியர் என்பதாலேயே அவர் குறிவைக்கப்படுகிறார் என்று கூறி பா.ஜ.க-வை விமர்சித்துள்ளார். மேலும், பா.ஜ.க கூட்டணிக் கட்சியைச் சேர்ந்த தலைவர்களும் சங்கீத் சோமின் கருத்துகளை கண்டித்துள்ளனர்.
பி.சி.சி.ஐ விளக்கம்
இந்த சர்ச்சை குறித்து இந்திய கிரிக்கெட் கட்டுப்பாட்டு வாரியம் தற்போது மவுனம் கலைத்துள்ளது. வங்கதேச வீரர்கள் ஐ.பி.எல். போட்டிகளில் பங்கேற்பதைத் தடை செய்ய மத்திய அரசிடமிருந்து எந்த உத்தரவும் வரவில்லை என்றும், இந்த விவகாரத்தில் தங்களுக்கு தலையிட முடியாது என்றும் பி.சி.சி.ஐ வட்டாரங்கள் தெரிவித்துள்ளன.
முஸ்தாபிசுர் ரஹ்மானின் கிரிக்கெட் பயணம்
முஸ்தாபிசுர் ரஹ்மான் (Mustafizur Rahman) இதுவரை 60 ஐ.பி.எல். போட்டிகளில் விளையாடி, 8.13 என்ற எகானமி ரேட்டில் 65 விக்கெட்டுகளை வீழ்த்தியுள்ளார். மேலும், 2016ஆம் ஆண்டு சன்ரைசர்ஸ் ஐதராபாத் அணிக்காக ஐ.பி.எல்.-ல் அறிமுகமான அவர், பின்னர் மும்பை இந்தியன்ஸ், ராஜஸ்தான் ராயல்ஸ், டெல்லி கேபிடல்ஸ் மற்றும் சென்னை சூப்பர் கிங்ஸ் அணிகளுக்காகவும் விளையாடியுள்ளார்.
ஒரு கிரிக்கெட் வீரரின் தேர்வு விளையாட்டு முடிவா, அரசியல் மற்றும் சமூக பின்னணியுடன் பார்க்கப்பட வேண்டிய விஷயமா என்ற விவாதத்தை இந்த சம்பவம் மீண்டும் தீவிரப்படுத்தியுள்ளது. கொல்கத்தா அணியின் இந்த முடிவு, ஐ.பி.எல். கிரிக்கெட்டின் விளையாட்டு எல்லையை தாண்டி, அரசியல் மற்றும் சமூக விவாதங்களின் மையமாக மாறியுள்ளது.
About the Author
