Graphical Image
வாட்ஸ்ஆப் மூலம் குழு தொடங்கி ஆன்லைன் மூலம் பங்கு சந்தையில் முதலீடு செய்து 500 மடங்கு லாபம் சம்பாதிக்கலாம் என நம்பும் வகையில் போலியான செய்தி பரிமாற்றங்கள் செய்து பொது மக்களை நம்ப வைத்து Online Share Trading என்ற போர்வையில் பணம் பறித்த சைபர் குற்றவாளிகளை தமிழ்நாடு சைபர் குற்றப் பிரிவு கைது செய்தது.
கடந்த ஏப்ரல் மாதம் சைபர் குற்றவாளிகளின் ஏமாற்று வேளையில் சிக்கிய பாதிக்கப்பட்ட ஒருவர் சுமார் 14 கோடியை முதலீடு செய்துள்ளார். பாதிக்கப்பட்டவர் தான் முதலீடு செய்த பணம் திரும்ப கிடைக்காத நிலையில் தான் ஏமாற்றப்பட்டதை அறிந்து National Cyber Crime Reporting Portal ல் புகார் அளித்த-தன் அடிப்படையில் SCCIC (State Cyber Crime Investigation Centre), Cr.No.32/2024, U/s. 420 IPC, 66D IT (Amendment) Act, 2008,- முதல் தகவல் அறிக்கை பதிவு செய்யப்பட்டு மோசடி செய்யப்பட்ட பணம் வரவு வைக்கப்பட்ட 13 வங்கி கணக்குகள் உடனடியாக முடக்கம் செய்யப்பட்டது.
பின்னர் சென்னை அசோக் நகரில் உள்ள தலைமையக சைபர் கிரைம் தனிப்படை குழுவினர் விரைந்து செயல்பட்டு மோசடி செய்யப்பட்ட ரூபாய் 21,50,000/- பணத்தை தனது வங்கி கணக்கில் பெற்று பதுக்கிய செங்கல்பட்டை சேர்ந்த சுப்பிரமணியன் என்பவரை கைது செய்தும் பின்னர் அவரின் ஒப்புதல் வாக்குமூலத்தின்அடிப்படையில் தலை மறைவில் இருந்த மதன், சரவணபிரியன், சதீஷ்சிங், ஷாபகத் மணிகண்டன், துரைபாண்டியன் ஆகிய சைபர் மோசடி குற்றவாளிகள் கைது செய்யப்பட்டு சிறையில் அடைக்கபட்டனர்.
இதில் மணிகண்டன் என்பவர் மோசடி செய்யப்பட்டபணத்தை ஷபாகத் என்பவர் மூலம் USDD ஆக மாற்றம் செய்ய முயற்சி செய்துள்ளார். மேற்படி குற்றவாளிகளிடமிருந்து குற்ற செயல்களுக்கு பயன்படுத்தப்பட்ட செல்போன்கள் பறிமுதல் செய்யப்பட்டு ஆய்வுக்கு அனுப்பி வைக்க உள்ளது. இந்த சைபர் குற்ற செயல்களுக்கு மூளையாக செயல்பட்ட வடமாநில கும்பளை கைது செய்யவும் மோசடி செய்யபட்ட பணத்தை மீட்கவும் தீவிர நடவடிக்கை எடுத்து வருவதாக சைபர் குற்றப் பிரிவு தெரிவித்துள்ளது.
பொதுமக்கள் இதுபோன்ற சைபர் குற்றங்களில் இருந்து பாதுகாப்பாக இருக்க கீழ்கண்ட அறிவுரைகளை சைபர் குற்றப் பிரிவு வழங்கியுள்ளது:-
1. பொதுமக்கள் இது போன்ற கவர்ச்சிகாரமான தகவல்களை நம்பவேண்டாம் இதுபோன்ற மோசடிகளை அடையாளம் கண்டு கணினிசார் குற்றப் பிரிவு அல்லது அருகிலுள்ள காவல் நிலையத்தை தொடர்பு கொள்ள அறிவுறுத்தப்படுகிறார்கள்.
2. இது போன்ற அதிகபடியான லாபம் கொடுப்பதாக உத்திரவாதம் கொடுத்தால் அதில் மோசடிக்கான வாய்ப்பு அதிகம் உள்ளது. விழிப்புடன் இருக்க அறிவுறுத்தபடுகிறார்கள்.
3. தனிப்பட்ட தகவல்கள் மற்றும் நிதி சார்ந்த தகவல்களை அறிமுகமில்லாத நபர்களிடம் தொலைபேசியில் அளிக்காதீர்கள்.
4. மோசடி செய்பவர்கள் நமக்கு யோசிக்க நேரமளிக்காமல் அவசரமான சூழலில் இருப்பதாக நம்ப செய்வர். நம்பகமான நண்பர்கள் அல்லது குடும்பத்தினருடன் கலந்தாலோசித்து செயல்படவும்.
5. சைபர் மோசடிகள் மற்றும் அவர்களின் ஏமாற்றுத்தந்திரங்களை தொடர்ந்து அறிந்து வைத்திருங்கள். குற்றம் நடைபெறாமல் தடுக்க விழிப்புடன் இருப்பது முக்கியம்.
6. உங்கள் வங்கி மற்றும் கடனட்டை கணக்குகளில் அனுமதிக்கப்படாத பரிவர்த்தனைகள் ஏதும் உள்ளதா என தவறாமல் சரிபார்க்கவும்.
முக்கியமான கணக்குகளில் இரு காரணி பாதுகாப்பைப் பயன்படுத்தவும்.
7. மேலும், பொதுமக்கள் தங்களது வங்கிக்கணக்குகளை மற்றவர்கள் பயன்படுத்த அனுமதிக்கக்கூடாது என அறிவுறுத்தப்படுகிறார்கள். ஏனெனில் இது போன்ற கணக்குகள் நிதி மோசடிகளுக்கு பயன்படுத்தப்படுகிறது. யாரேனும் இதுபோன்ற செயல்களில் ஈடுபடுவது கண்டறியப்பட்டால், அவர்கள் மீது உரிய நடவடிக்கை எடுக்கப்படும்.
நீங்கள் இது போன்ற மோசடிக்கு ஆளாகியிருந்தால், சைபர் கிரைம் கட்டணமில்லா உதவி எண் 1930 ஐ டயல் செய்து சம்பவத்தைப் புகாரளிக்கவும் அல்லது www.cybercrime.gov.in என்ற இணையதளத்தில் உங்களது புகாரைப் பதிவு செய்யலாம்.
About the Author
