Graphical Image
அமெரிக்க அதிபர் டொனால்ட் டிரம்ப் பிற உலக நாடுகள் மீது அதிக இறக்குமதி வரிகளை விதிக்கும் திட்டங்களிலிருந்து பின்வாங்கவில்லை என்றால், 1930-களில் ஏற்பட்ட பெரும் மந்தநிலையைப் போல உலகப் பொருளாதாரம் சரிந்துவிடும் என்று சர்வதேச வர்த்தக சபை (International Chamber of Commerce) எச்சரித்துள்ளது.
டிரம்பின் திட்டங்கள் 1930-களின் வர்த்தகப் போர் சகாப்தத்தை போன்றதொரு நிலைக்கு நம்மைத் தள்ளும் என்றும், ஒரு கீழ்நோக்கிய சுழற்சியின் தொடக்கமாக இருக்கலாம் என்றும் சர்வதேச வர்த்தக சபையின் துணைப் பொதுச் செயலாளர் ஆண்ட்ரூ வில்சன் கவலை தெரிவித்துள்ளார்.
1930-களின் காலகட்டத்தில் அமெரிக்காவிற்கு இறக்குமதி செய்யப்படும் வெளிநாட்டுப் பொருட்களின் மீது அதிக வரிகள் விதிக்கப்பட்டதன் எதிரொலியல், அப்போது நிலவிய பேரழிவுகரமான உலகளாவிய மந்தநிலையை மேலும் மோசமாக்கியது.
அமெரிக்கா மற்றும் ஜெர்மனி போன்ற சக்திவாய்ந்த தொழில்துறை நாடுகளில் ஏற்பட்ட பொருளாதார மந்தநிலை உலகளவில் 50 சதவீதம் வரை உற்பத்தியைக் குறைத்தது மட்டுமல்லாமல், கிட்டத்தட்ட மூன்றில் ஒரு பங்க உலக தொழிலாளர் வர்க்கத்தினரை வேலையின்மையில் தள்ளியது என்று சர்வதேச நாணய நிதியம் (IMF) கண்டறிந்துள்ளது.
1930 காலகட்டத்தில், தற்போது அமெரிக்காவில் ஆட்சியை பிடித்துள்ள டிரம்ப் தலைமையிலான குடியரசுக் கட்சி தான் அப்போதும் ஆட்சியில் இருந்தது. அமெரிக்காவின் செல்வத்தை பெருக்க வெளிநாடுகள் மீது அப்போதைய அதிபர் ஹெர்பர்ட் ஹூவர் தலைமையிலான குடியரசுக் கட்சியின் ஆட்சியில் அதிக வரிகள் விதிக்கப்பட்டது. அந்த தாக்கத்தின் காரணமாக, அப்போது உலக வர்த்தகத்தில் சுமார் 65% சரிவுக்கு பங்களித்தது என்பது குறிப்பிடத்தக்கது.
உலகில் மீண்டும் பெரும் மந்தநிலை ஏற்படும் அபாயம்
கனடா, சீனா மற்றும் மெக்சிகோ மீதான புதிய வரி விதிப்பு நடவடிக்கை மூலம் டிரம்ப் முதற்கட்ட வர்த்தகப் போரை தூண்டியுள்ளார். சீனப் பொருட்கள் மீது ஏற்கனவே 10% வரிகளை அமெரிக்கா விதித்திருந்த நிலையில், தற்போது கூடுதலாக 10% வரிகளை டிரம்ப் விதித்துள்ளார்.
மேலும், கனடா மற்றும் மெக்சிகோவிலிருந்து இறக்குமதி செய்யப்படும் பொருட்களுக்கு 25% வரிகளை விதித்ததன் மூலம் டிரம்ப் அமெரிக்காவின் முதல் 3 முக்கிய வர்த்தக பங்காளிகளுடன் புதிய வர்த்தக மோதல்களைத் தூண்டியுள்ளார்.
இந்த முதற்கட்ட வரி விதிப்புகள் அமெரிக்கா மற்றும் அந்த நாடுகள் இடையேயான இருவழி வருடாந்திர வர்த்தகத்தில் கிட்டத்தட்ட $2.2 டிரில்லியன் மதிப்பிலான வர்த்தகத்தை சீர்குலைக்கும் ஆற்றலைக் கொண்டுள்ளன என கணிக்கப்படுகிறது.
டிரம்பின் அறிவிப்புகள் பொருளாதார மந்தநிலை அச்சங்களைத் தூண்டுகிறது
கனடா மற்றும் மெக்சிகோ பொருட்களின் மீதான வரிகளின் தாக்கம், விவசாயப் பொருட்களை பதப்படுத்துவதற்கும், கச்சா எண்ணெய்யை சுத்திகரிப்பதற்கும், ஆட்டோமொபைல்கள் மற்றும் இயந்திரங்களை தயாரிப்பதற்கும் எல்லை தாண்டிய ஏற்றுமதிகளை நம்பியிருக்கும் வட அமெரிக்க பொருளாதாரத்திற்கு மிகவும் பின்னடைவாக பார்க்கப்படுகிறது.
“டிரம்ப் நிர்வாகத்தின் இன்றைய பொறுப்பற்ற முடிவு கனடாவையும் அமெரிக்காவையும் மந்தநிலைக்கும், வேலை இழப்புகள் மற்றும் பொருளாதார பேரழிவை நோக்கியும் தள்ளுகிறது” என்று கனேடிய வர்த்தக சபையின் தலைமை நிர்வாக அதிகாரி கேண்டஸ் லாயிங் தெரிவித்துள்ளார்.
அவரது கூற்றுப்படி, அமெரிக்க வரிகளின் விளைவாக விநியோக வலையமைப்புகள் சீர்குலைந்து, நுகர்வோர் மற்றும் உற்பத்தியாளர் செலவுகள் அதிகரிக்கும் என்றும், ‘பிற நாடுகள் மீது விதிக்கப்படும் வரி என்பது அமெரிக்க மக்கள் மீது விதிக்கப்படும் வரியே’ என்றும் கேண்டஸ் லாயிங் கூறியுள்ளார்
கடந்த திங்களன்று வெளியிடப்பட்ட அமெரிக்க அரசின் தரவு, டிரம்பின் வரி விதிப்பு அறிவிப்புக்கு முன்பே தொழிற்சாலை வாயில் செலவுகள் (Factory Gate Cost) கிட்டத்தட்ட மூன்று ஆண்டுகளில் இல்லாத அளவுக்கு உயர்ந்துள்ளன என்பதைக் காட்டுகிறது. மேலும், புதிய வரி விதிப்பு அறிவிப்புகள் அமல்படுத்தப்பட்டால், விரைவில் உற்பத்தியைத் தடுக்கக்கூடும் சாத்தியம் இருக்கிறது என்பதை இது குறிக்கிறது.
இந்தியா, பிரேசில், ஐரோப்பிய ஒன்றியம் உள்ளிட்ட வெளிநாடுகள் மீது பரஸ்பர வரிகள் விதிக்கப்படும் என்று டிரம்ப் அறிவித்தது முதல், உலகளாவிய பங்குச் சந்தைகளையும் நாணயங்களையும் சரிவுக்கு கொண்டுவந்துள்ளன.
டிரெண்டிங்கில் ‘Great Depression’
டிரம்பின் நடவடிக்கைகள் மீது பொருளாதார நிபுணர்கள் எச்சரிக்கை விடுத்து வருவதற்கு மத்தியில், ‘Great Depression’ குறித்து X தளத்தில் பெரிதும் விவாதிக்கப்பட்டு வருகிறது. #TrumpIsUnfitForOffice என்ற டாக்கும் டிரெண்ட் செய்யப்படுகிறது.
“அமெரிக்கா கடைசியாக 1930 ஆம் ஆண்டு இதுபோன்ற ஒரு வரி விதிப்பை செய்து பெரும் மந்தநிலையைத் தூண்டியது,” என்று பயனர் ஒருவர் பதிவிட்டுள்ளார்.
“உலகின் அடுத்த பெரும் மந்தநிலையை வடிவமைக்க முயற்சிக்கும் பல பில்லியனர்கள் வெள்ளை மாளிகையில் சுற்றி அமர்ந்திருக்கிறார்கள்” என்று மற்றொருவர் கருத்து பதிவிட்டுள்ளார்.
The last time America increased tariffs like this, it was 1930 — and it triggered the Great Depression. pic.twitter.com/qtcv5zwtuk
— StockMars (@StockMars) March 5, 2025
‘Great Depression’ குறித்து 1986-ம் ஆண்டு வெளியான ‘ஃபெர்ரிஸ் புல்லர்ஸ் டே ஆஃப்’ என்ற அமெரிக்க திரைப்படத்தில் பேசப்பட்டுள்ள காட்சியும் X தளத்தில் வைரல் ஆகி வருகிறது.
About the Author
