பெரிய பணக்காரன் இல்லை என்று சொல்லி வட்டிப் பணத்தை செலுத்த மறுத்ததால், ‘திவாலானவர்’ என்று அறிவிக்கத் தயாரா? என்று கேட்டு கிடுக்கிப்பிடி போட்டது ஐகோர்ட்.
நடிகர் விஷால் தனது ‘விஷால் பிலிம் பேக்டரி’ தயாரிப்பு நிறுவனம் மூலமாக படங்கள் தயாரித்து வருகிறார். இதற்காக பிரபல சினிமா பைனான்சியர் ‘கோபுரம் பிலிம்ஸ்’ அன்புச்செழியனிடம் இருந்து 21 கோடியே 29 லட்சம் ரூபாய் கடனாக வாங்கி இருக்கிறார். அந்தக் கடனை திருப்பி கேட்டு அன்புச்செழியன் நெருக்கடி கொடுத்து வந்ததால், ‘லைகா’ நிறுவனத்திற்கு படம் நடித்து தருவதாகச் சொல்லி அந்த நிறுவனத்திடம் இருந்து பணத்தை வாங்கி அன்புச்செழியனிடம் கொடுத்து கடனை அடைத்திருக்கிறார் விஷால்.
சொன்னடி லைகா நிறுவனத்திற்கு படம் நடித்து தராததால் பேச்சுவார்த்தை நடத்தி விஷால் பிலிம் பேக்டரி நிறுவனத்தின் அனைத்து பட உரிமைகளும் லைகா நிறுவனத்திற்கு வழங்குவதென விஷால் ஒப்பந்தம் எழுதிக்கொடுத்துள்ளார். ஆனால் ஒப்பந்தத்தின் படி நடந்துகொள்ளாததால் சென்னை உயர்நீதிமன்றத்தை நாடியது லைகா நிறுவனம். இந்த வழக்கை விசாரித்து வந்த உயர்நீதிமன்ற தனி நீதிபதி, லைகா நிறுவனத்திடம் இருந்து பெற்ற 21 கோடியே 29 லட்ச ரூபாயை 30 சதவிகித வட்டியுடன் திருப்பி தரவேண்டும் என்று உத்தரவிட்டார்.
இந்த உத்தரவை எதிர்த்து விஷால் மேல்முறையீடு செய்தார். இரு நீதிபதிகள் அமர்வில் இந்த வழக்கு விசாரணைக்கு வந்தபோது, 30 சதவிகித வட்டி என்றால் வட்டி மட்டுமே 40 கோடி ரூபாய் வருகிறது. அந்த அளவுக்கு விஷால் பணக்காரர் இல்லை என்று விஷால் தரப்பு வாதிட்டது. அதற்கு நீதிபதிகள், அப்படி என்றால் விஷால் திவாலானவர் என்று அறிவிக்க தயாரா? என்று கேள்வி எழுப்பினர்.
அதே நேரம், 30 சதவிகித வட்டி என்பது அதிகம். இப்படி சுரண்டப்படுவதை ஏற்க முடியாது என்று லைகா தரப்பை சாடினர்.
30 சதவிகிதம் வட்டி விதித்த தனி நீதிபதியின் உத்தரவுக்கு இடைக்கால தடை விதித்த நீதிபதிகள், விஷால் தரப்பு 10 கோடி ரூபாய் டெபாசிட் செய்ய உத்தரவிட்டனர். வழக்கின் மறு விசாரணையை 4 வாரங்களுக்கு தள்ளி வைத்தனர். இது தொடர்பாக லைகா பதிலளிக்கவும் உத்தரவிட்டுள்ளனர்.
About the Author
