அதிமுகவில் ஒருங்கிணைப்பை வலியுறுத்தியதால் அக்கட்சியில் 50 ஆண்டுகாலம் களப்பணியாற்றி வருகிறார் என்பதைக்கூட பார்க்காமல் செங்கோட்டையனை கட்சியில் இருந்து நீக்கிவிட்டார் பழனிசாமி. இதையடுத்து இன்று தனது எம்.எல்.ஏ. பதவியை ராஜினாமா செய்துள்ளார் செங்கோட்டையன்.
அதிமுகவில் இருந்து நீக்கப்பட்டதால் வேறு கட்சியில் இணைய முடிவெடுத்திருக்கிறார் செங்கோட்டையன். கட்சி தாவல் சட்டட்டத்தின் படி எம்.எல்.ஏ. பதவிக்கு ஆபத்து ஏற்படும் என்பதால் முன்கூட்டியே தனது பதவியை இன்று ராஜினாமா செய்துள்ளார் செங்கோட்டையன்.
நாளை அவர் எந்த கட்சியில் இணையப்போகிறார்? என்ற பரபரப்பு எழுந்திருக்கிறது. அவர் தவெகவில் இணையப்போகிறார் என்று தகவல் பரவி வந்த நிலையில் இன்று திமுகவில் இணையப்போவதாகவும் தகவல் பரவுகிறது. எந்த கட்சியில் இணையப்போகிறார்? என்பது குறித்து செங்கோட்டையன் இன்று சொல்ல மறுக்கிறார். ’’இன்று ஒரு நாள் பொறுத்திருங்கள்’’ என்பதுதான் அவரது பதிலாக அமைந்திருக்கிறது.
’’அதிமுகவில் இருந்து விலகுவோருக்கு திமுகதான் சிறந்த வாய்ப்பு. அதனால் செங்கோட்டையன் திமுகவுக்கு வரவேண்டும்’’ என்று அதிமுகவில் இருந்து விலகி அண்மையில் திமுகவில் இணைந்த அன்வர்ராஜா அழைப்பு விடுத்துள்ளார்.
சபாநாயகரிடம் ராஜினாமா கடிதத்தை கொடுத்த பின்னர் அவரது அறையில் திமுக அமைச்சர் சேகர்பாபு சென்று செங்கோட்டையனிடம் 5 நிமிடங்கள் பேசினார். சேகர்பாபு அதிமுகவில் இருந்த போது செங்கோட்டையனிடம் நல்ல பழக்கம் உண்டு. அந்த அடிப்படையில் சேகர்பாபுவும் செங்கோட்டையனுக்கு அழைப்பு விடுத்திருக்கிறார் என்று கூறப்படுகிறது.
நாளை துணை முதல்வர் உதயநிதி ஸ்டாலின் பிறந்த நாள் கொண்டாட்டம் நடைபெறும் நிலையில், நாளைய தினமே செங்கோட்டையன் திமுகவில் இணைகிறார், உதயநிதிக்கு பிறந்தநாள் பரிசாக இது அமைகிறது என்ற பேச்சும் எழுந்திருக்கிறது,
திமுகவில் இருந்து அதிமுக சென்றவர்தான் செங்கோட்டையன். செங்கோட்டையனின் சித்தப்பா திமுக ஒன்றிய சேர்மனாக இருந்தவர். 1970களில் திமுக சார்பில் போட்டியிட்டு வென்று ஊராட்சி ஒன்றிய குழுவின் துணைத்தலைவராக செயல்பட்டு வந்தவர் செங்கோட்டையன். அதன் பின்னர்தான் அதிமுகவில் இணைந்து எம்.எல்.ஏ. ஆகி, 9 முறை எம்.எல்.ஏ.வாக ஆனார். அவர் மீண்டும் தாய்க்கழகமான திமுகவில் இணைகிறாரா? என்ற பரபரப்பு எழுந்திருக்கிறது.
About the Author
