என்னதான் செங்கோட்டையனுக்கும் அதிமுகவுக்கு எந்த சம்பந்தமும் இல்லை என்று எடப்பாடி பழனிசாமியும், சி.வி.சண்முகமும் ஆத்திரம் பொங்கச் சொன்னாலும் அதிமுகவின் முகமாகவே அறியப்படுகிறார் செங்கோட்டையன். இதே கதைதான் ஓ.பன்னீர்செல்வம், டிடிவி தினகரன் உள்ளிட்டோருக்கும்.
டெல்லியின் அழுத்தத்தில் தன்னுடன் பக்கம் பலமாக நின்று 5 பேரின் உந்துதலில் அதிமுகவில் ஒருங்கிணைப்பை வலியுறுத்தி வந்த செங்கோட்டையன், தேர்தல் நெருக்கம் என்பதால் மேலும் டெல்லி அழுத்தம் கொடுக்க பொதுவெளியிலேயே ஒருங்கிணைப்பு குறித்து பேசியது பழனிசாமியை சூடாக்கியது. இதனால் செங்கோட்டையனை அதிமுவில் தூக்கி கடாசிவிட்டார். அவரை மட்டுமல்லாது அதிமுக முன்னாள் எம்.பி. சத்யபாமா உள்ளிட்ட அவரது ஆதரவாளர்களை கூண்டோடு வெளியே எறிந்துவிட்டார்.
இவர்களை எல்லாம் தூக்கி கடாசிவிட்டு, செங்கோட்டையன் தொகுதியை கைப்பற்றும் நடவடிக்கைகளில் தீவிரம் காட்டி வருகிறார் பழனிசாமி.
கூட்டணி விசயத்தில் டெல்லி கைவிரித்து விட்டதால் நட்டாற்றில் நின்ற செங்கோட்டையனுக்கு கதவு திறந்திருக்கிறது தவெக. காஞ்சிபுரத்தில் நடந்த மக்கள் சந்திப்பிற்கு பின்னர் விஜயுடன் சந்தித்து பேசியிருக்கிறார் செங்கோட்டையன். நாளை 26ம் தேதி அல்லது நாளை மறு தினம் 27ம் தேதி தவெகவில் இணைய முடிவெடுத்திருக்கிறார் செங்கோட்டையன்.
செங்கோட்டையன் தவெகவில் இணைந்த பின்னர் அவரது ஆதரவாளர் முன்னாள் அதிமுக எம்.பி. திலகபாமாவும் தவெகவில் இணைய முடிவெடுத்துள்ளார். அதிமுகவில் இருந்து நீக்கப்பட்ட செங்கோட்டையன் ஆதரவாளர்கள் அனைவருமே தவெகவில் இணைய உள்ளனர். செங்கோட்டையன் இணைப்பால் ஈரோட்டில் தவெகவுக்கு ஒரு எம்.எல்.ஏ. உறுதியாகிவிட்டது என்கிறது பனையூர் வட்டாரம்.
பசும்பொன்னில் செங்கோட்டையனுடன் இணைந்த டிடிவி தினகரன் மற்றும் ஓ.பன்னீர்செல்வம் இருவரும் தவெக அணியில் இணைய வாய்ப்பிருக்கிறது என்கிற பேச்சு எழுந்திருக்கிறது.
About the Author
