தமிழ் சினிமாவின் முன்னணி நடிக்கர்களில் ஒருவராகத் திகழும் நடிகர் தனுஷ் அடுத்தடுத்து தொடர்ச்சியான ஹிட் படங்களை கொடுத்து வருகிறார்.
கடந்த மாதம் நடிகர் தனுஷ் நடிப்பில் வெளியான ‘கேப்டன் மில்லர்’ திரைப்படம் பாக்ஸ் ஆபிஸில் வசூல் சாதனை படைத்தது. ‘கேப்டன் மில்லர்’ படத்தின் இரண்டாம் பாகமும் உருவாகவுள்ளதாக கூறப்படுகிறது.
தனது நடிப்பாற்றலின் மூலம் பல விதமான கதாப்பத்திரத்தில் நடித்து தனது திறமைகளை தொடர்ச்சியாக வெளிப்படுத்தி வரும் நடிகர் தனுஷ், திரைப்படத் இயக்குனர்களின் பிடித்தமான நடிகர்களில் ஒருவராக திகழ்ந்து வருகிறார்.
இந்த சூழலில், தனுஷின் சிறந்த படங்களில் ஒன்றான புதுப்பேட்டை திரைப்படத்தின் இரண்டாம் பாகம் குறித்த அறிவிப்பு வெளியாகி ரசிகர்களின் எதிர்பார்ப்பை தூண்டியுள்ளது.
கடந்த 2006-ம் ஆண்டு நடிகர் தனுஷ் நடிப்பில் வெளியாகி பெரும் வரவேற்பை பெற்ற கேங்ஸ்டர் படமான ‘புதுப்பேட்டை’ படத்தின் 2-ம் பாகம் உருவாகவுள்ளதாக இயக்குனர் செல்வராகவன் தெரிவித்துள்ளார்.
இப்படத்தின் இரண்டாம் பாகம் வேண்டும் என ரசிகர்கள் நீண்ட காலமாக கேட்டு வந்த சூழலில், இயக்குனர் செல்வராகவன் தனது X தள அதிகாரப்பூர்வ கணக்கில் இதற்கான அறிவிப்பை வெளியிட்டுள்ளார்.
“புதுப்பேட்டை-2 திரைப்படம் இந்த வருடத்தில் எடுப்பேன் என நம்புகிறேன்”, என செல்வராகவன் பதிவிட்டுள்ளார்.
About the Author
