அதிமுக முன்னாள் எம்.எல்.ஏ. சுதர்சனம் கொலை வழக்கில் குற்றவாளிகள் பவாரியா கொள்ளையர்கள் மூன்று பேருக்கும் ஆயுள் தண்டனை வழங்கி தீர்ப்பளித்துள்ளது சென்னை கூடுதல் அமர்வு நீதிமன்றம். 2005ல் நடந்த சம்பவத்திற்கு 20 ஆண்டுகளுக்கு பின் தீர்ப்பு வழங்கப்பட்டுள்ளது.
20 ஆண்டுகளுக்கு மேலாக புழல் மத்திய சிறையில் இருக்கும் குற்றவாளிகள் ஜெகதீஷ், ராகேஷ், அசோக் மூவருக்கும் இன்று ஆயுள் தண்டனை அளித்திருக்கிறது நீதிமன்றம்.
சுட்டுக்கொலை: 2001 -2006 காலகட்டத்தில் ஜெயலலிதா அமைச்சரவையில் சிறிது காலம் பிற்படுத்தப்பட்டோர் நலத்துறை அமைச்சராக இருந்தார் சுதர்சனம். 2005ல் கும்மிடிப்பூண்டி தொகுதி எம்.எல்.ஏ. வாக இருந்தார். 2005ம் ஆண்டு ஜனவரி மாதம் 9ம் தேதி அன்று திருவள்ளூர் மாவட்டம் கும்மிடிப்பூண்டி தொகுதியில் பெரியபாளையம் அருகே தானாகுளத்தில் உள்ள வீட்டில் குடும்பத்தினருடன் இரவில் தூங்கிக் கொண்டிருந்தார் சுதர்சனம்.
வீட்டின் அருகே இருந்த தென்னை மரத்தின் வழியாக ஏறி மேல்மாடிக்குச் சென்று அங்கிருந்து வீட்டிற்குள் நுழைந்தனர் 6 பேர் கொண்ட பவாரியா கொள்ளைக்கும்பல். மாடி அறையில் சுதர்சனத்தின் மகன்கள் விஜயகுமார், சதீஷ் இருந்தனர். ஒரு மகன் இருந்த அறையை வெளிப்பக்கமாக தாழ்ப்பாள் போட்டுவிட்டு இன்னொரு அறைக்குள் புகுந்து மகனையும் அவரது மனைவியையும் கொடூரமாக தாக்கிப்போட்டுள்ளனர். அப்போது சத்தம் கேட்டு கீழ் அறையில் இருந்து ஓடி வந்த சுதர்சனத்தை ஒருவன் துப்பாக்கியால் சுட்டு சாய்த்தான். பின்னர் பீரோ, அலமாரிகளை உடைத்து 64 பவுன் நகைகளை எடுத்துக்கொண்டு தப்பினார்கள்.
சத்தம் கேட்டு ஓடி வந்த அக்கம் பக்கத்தினர் மீது வெடிகுண்டுகளை வீசி விரட்டி அடித்தனர். அதன் பின்னர் அங்கிருந்து 1 கிலோ மீட்டர் தூரம் நடந்து சென்று நின்றிருந்த லாரியில் ஏறி தப்பினர்.
சுதர்சனம் வீடு அட்டாக்கில் பெரியபாளையம் போலீசார் வழக்கு பதிவு செய்து விசாரித்து வந்தனர்.
தன் கட்சி எம்.எல்.ஏ. ஒருவர் சுட்டுக் கொல்லப்பட்டதால் ஆத்திரமடைந்த அப்போதைய முதல்வர் ஜெயலலிதா, குற்றவாளிகளை சுட்டுப்பிடிக்க உத்தரவிட்டார் . குற்றவாளிகளை பிடிக்க ஜாங்கிட் தலைமையில் ஒரு சிறப்பு புலனாய்வுக் குழுவையும் அமைத்தார்.
கொலையாளிகள் சிக்கியது எப்படி?: ஜாங்கிட்டின் விசாரணையில் சுதர்சனம் வீட்டை அட்டாக் செய்தது பவாரியா கும்பல் என்று தெரியவந்தது. 1995ல் இருந்து 2005ம் ஆண்டு வரையிலும் 10 ஆண்டுகளாக தமிழகத்தில் நடந்த அனைத்து சம்பவங்களும் ஒரே மாதிரியாக இருந்ததால் சிறப்பு புலனாய்வுக்குழுவின் விசாரணையில் இந்த குற்றச்சம்பவங்களை செய்தது பவாரியா கொள்ளையர்கள் என்பது தெரியவந்தது. கைரேகை ஆய்வில் இது உறுதியானது. தமிழகத்தில் 1995ம் ஆண்டில் இருந்து 2005ம் ஆண்டு வரையிலும் 10 ஆண்டுகாலமாக 13 கொலை, 24 கொள்ளை குற்றங்களை கொடூரத்தை அரங்கேற்றி பெரும் அதிர்வலைகளை ஏற்படுத்தி வந்தனர் பவாரியா கொள்ளையர்கள்.1996முதல் 2000 வரையிலும் தமிழகத்தில் இவர் சம்பவங்களை செய்யாமல் இருந்ததற்கு காரணம், அப்போது இவர்கள் சிறையில் இருந்தார்கள் என்பதும் தெரியவந்தது.
ஜாங்கிட்டின் தனிப்படையினர் அதிரடியில் அரியானா மாநிலத்தைச் சேர்ந்த ஓம் பிரகாஷ், அவரது சகோதரர் ஜெகதீஷ் மற்றும் அசோக், ராகேஷ், ஜெயில்தர் சிங் ஆகியோரை கைது செய்தனர்.
சென்னை புழல் மத்திய சிறையில் அடைக்கப்பட்டிருந்த ஓம் பிரகாஷ் உடல் நலக்குறைவால் உயிரிழந்தான். அவனது சகோதரர் ஜெகதீஸ் பரா, 2005ம் ஆண்டில் இருந்து புழல் சிறையில் விசாரணை கைதியாக உள்ளான்.
இதற்கிடையில் பவாரியா கொள்ளையர்கள் சம்பவத்தை கதைக்களமாக வைத்துதான் தீரன் அதிகாரம் ஒன்று திரைப்படம் வந்தது. அந்த திரைப்படம் வெளியாகி 7 ஆகிவிட்டன என்பது குறிப்பிடத்தக்கது.
நீதிபதியின் அதிர்ச்சி: கடந்த 2021ம் ஆண்டில் இந்த வழக்கு விசாரணைக்கு வந்தபோது 15 ஆண்டுகளாயும் ஏன் இன்னும் இந்த வழக்கு முடிக்கப்படவில்லை? எந்த முன்னேற்றம் இல்லையே? என்று பெரியபாளையம் போலீசாரிடம் கேட்டு அதிர்ச்சியை வெளிப்படுத்தினார் நீதிபதி பாரதிதாசன்.
ஆயுள் தண்டனை: 20 ஆண்டுகளுக்கு மேலாக நடந்து வரும் இந்த வழக்கில் வரும் 21.11.2025 அன்று தீர்ப்பு வழங்கப்பட்டது. 32 பேர் மீது வழக்கு பதிவு செய்யப்பட்டதில் சிலர் மட்டுமே கைது செய்யப்பட்டார்கள். இதில் 2005ம் ஆண்டில் 2 பேர் என்கவுன்டர் செய்யப்பட்டனர். ஓம் பிரகாஷ் உள்பட 2 பேர் சிறையிலேயே உயிரிழந்துவிட்டனர். ஜாமீன் பெற்றுச் சென்ற 3 பெண்கள் தலைமறைவாகி விட்டனர். தற்போது புழல் மத்திய சிறையில் ஜெகதீஷ், ராகேஷ், அசோக், உள்ளிட்ட 3 பேரும் குற்றவாளிகள் என்று நீதிமன்றம் தீர்ப்பளித்தது. இவர்களுக்கான தண்டனை விபரம் வரும் 24 ம் தேதி அன்று அறிவிக்கப்படும் என்று நீதிமன்றம் தெரிவித்தது. அதன்படி இன்று குற்றவாளிகள் 3 பேருக்குமான தண்டனை விபரம் அளிக்கப்பட்டது. 3 பேருக்கும் ஆயுள் தண்டனை வழங்கி நீதிமன்றம் தீர்ப்பளித்துள்ளது.
About the Author
