கோபிசெட்டிப்பாளையம் தொகுதியில் அ.தி.மு.க.வின் நீண்டகால எம்.எல்.ஏ.வும், ஜெயலலிதா மற்றும் எடப்பாடி பழனிசாமி அமைச்சரவையில் அமைச்சராக இருந்தவரும் மூத்த அரசியல்வாதியுமான செங்கோட்டையன் தமிழக வெற்றிக் கழகத்தில் இணைந்து புதிய பதவியைப் பெற்றிருக்கிறார்.
எடப்பாடி பழனிசாமிக்கு சீனியரான செங்கோட்டையனால் அ.தி.மு.க.வில் முதல் இடத்துக்கு வர முடியவில்லை. கட்சியைத் தன் கட்டுப்பாட்டுக்குள் கொண்டு வந்துவிட்ட எடப்பாடி பழனிசாமியுடனும் சுமூக உறவில்லை. அதனால், கட்சியிலிருந்து பிரிந்து சென்றவர்களை மீண்டும் ஒருங்கிணைக்கப் போகிறேன் என்றார். இதை எடப்பாடி பழனிசாமியால் ஏற்க முடியவில்லை. செங்கோட்டையனையும் அவரது ஆதரவாளர்களையும் அ.தி.மு.க.வை விட்டே நீக்கினார்.
செங்கோட்டையன் அயோத்தி ராமர் கோவிலுக்கு செல்வதாகச் சொல்லி விமானம் ஏறி, டெல்லிக்கு சென்றார். பா.ஜ.க. தலைவர்களை சந்தித்தார். ஆலோசனைகளைப் பெற்றார். அதன்பின், தன்னுடைய எம்.எல்.ஏ. பதவியை ராஜினாமா செய்துவிட்டு, நடிகர் விஜய்யை சந்தித்து அவரது தமிழக வெற்றிக் கழகத்தில் சேர்ந்திருக்கிறார். விஜயகாந்த்துடன் பண்ருட்டி ராமச்சந்திரன் என்கிற நீண்டகால அரசியல்வாதி இணைந்தது தே.மு.தி.க.வுக்கு பலமாக அமைந்தது போல, விஜய்யுடன் செங்கோட்டையன் இணைந்திருப்பது த.வெ.க.வுக்கு பலம் என்கிற ரீதியில் டி.வி. விவாதங்களில் ரெகுலர் கச்சேரி செய்யும் அரசியல் நோக்கர்கள் கணித்துக் கொண்டிருக்கிறார்கள்.
50 ஆண்டுகால அரசியல்வாதி என்ற பெயர் செங்கோட்டையனுக்கு உண்டு. அ.தி.மு.க முதன்முதலில் பொதுத்தேர்தலில் நின்ற 1977 முதல் கடந்த 2021 வரை அவர் ஒவ்வொரு தேர்தலிலும் போட்டியிட்டிருக்கிறார். 1977ல் சத்தியமங்கலம் தொகுதியில் வெற்றி பெற்றார். அதன்பிறகு, 1980 முதல் 2021 வரை கோபி தொகுதியில் போட்டியிட்டு 9 முறை வெற்றி பெற்றிருக்கிறார். 1996ஆம் ஆண்டு நடைபெற்ற தேர்தலில் அதே கோபி தொகுதியில், தி.மு.க வேட்பாளராக நிறுத்தப்பட்ட பெட்டிக்கடைக்காரர் வெங்கிடு என்பவரின் தோற்றுப் போனார். எனினும், தொடர்ச்சியாக பல முறை கோபி தொகுதியில் இவர் வெற்றி பெற்று வருவதால் ஈரோடு மாவட்ட அரசியலில் செங்கோட்டையனுக்கென முக்கிய பங்கு உண்டு.
இத்தனை முறை எம்.எல்.ஏ.வாகவும் 1996, 2001, 2011, 2018 என ஆகிய 4 முறை அமைச்சராகவும் இருந்த செங்கோட்டையனின் குறிப்பிடத்தக்க சாதனைகள் என்னவென்று கேட்டால், செங்கோட்டையனாலும் சொல்ல முடியாது, அவருடைய ஆதரவாளர்களாக அ.தி.மு.க.வில் இருந்தவர்களாலும் சொல்ல முடியாது, இப்போது அவர் இணைந்திருக்கும் த.வெ.க. கட்சி நிர்வாகிகளாலும் சொல்ல முடியாது. ஏனென்றால், சொல்லக்கூடிய அளவிற்கான சாதனைகளை 50 ஆண்டுகால அரசியல்வாதியாக செங்கோட்டையன் எதுவும் செய்யவில்லை.
1989ஆம் ஆண்டு அ.தி.மு.க. இரண்டு அணிகளாக இருந்தது. எம்.ஜி.ஆர். மனைவி ஜானகி அணிக்கு எதிராக களமிறங்கிய ஜெயலலிதா அணி சார்பில் சேவல் சின்னத்தில் போட்டியிட்டு கோபி தொகுதியில் செங்கோட்டையன் வெற்றி பெற்றார். அப்போது அவர் செய்த சாதனை, முதலமைச்சரான கலைஞர் கருணாநிதி பட்ஜெட் படிக்கும்போது, ஜெயலலிதா உத்தரவின் பேரில் முதலமைச்சர் மீது பாய்ந்து, அவரைத் தாக்கி, முதல்வரின் கருப்புக் கண்ணாடி கீழே விழும்படி செய்ததுதான்.
1991-96 ஆட்சிக்காலத்தில் சந்தன கடத்தல் வீரப்பன் தேடுதல் வேட்டை என்ற பெயரில் வாச்சாத்தி கிராமத்தில் மலைவாழ் பெண்கள் பலர் கொடும் பாலியல் வன்முறைக்கு காவல்துறை மற்றும் வனத்துறையால் உள்ளானபோது போது இவர் தான் வனத்துறை அமைச்சராக இருந்தார். போக்குவரத்து அமைச்சராக இருந்த இவர் உதிரிபாகங்கள் வாங்குவதில் ஊழல் செய்ததாக சிறப்பு நீதிமன்றத்தில் நடந்த வழக்கில் தண்டிக்கப்பட்டு சிறை சென்றார். பிறகு, மீண்டும் அ.தி.மு.க. ஆட்சி அமைந்தபிறகு அப்பீல் செய்து விடுதலையானார். 2011ல் இவரை முதலில் வேளாண்துறை அமைச்சராகக்கிய ஜெயலலிதா இரண்டு மாதங்களிலேயே அந்த பதவியிலிருந்து எடுத்துவிட்டு, தகவல் தொழில்நுட்பத் துறை அமைச்சராக்கினார். ஆனால், நிர்வாகக் குளறுபடிகளாலும் செங்கோட்டையன் குடும்பத்தினரே அவர் மீது முதல்வர் ஜெயலலிதாவிடம் நேரடியாகத் தெரிவித்த அந்தரங்கக் குற்றச்சாட்டுகளாலும் அவருடைய அமைச்சர் பதவி பறிக்கப்பட்டது. 2016ல் அவர் வெற்றி பெற்றபோதும் ஜெயலலிதா அவருக்குப் பதவி வழங்கவில்லை. 2017ல் ஜெயலலிதா மறைவுக்குப் பிறகு எடப்பாடி பழனிசாமி முதலமைச்சரான போது பள்ளிக்கல்வித்துறை அமைச்சராக்கப்பட்டார் செங்கோட்டையன்.
+1 பொதுத்தேர்வு, பாடத்திட்டங்களில் ஆர்.எஸ்.எஸ். சித்தாந்தம், ஆசிரியர்கள் நியமனங்களில் முறைகேடு எனப் பல்வேறு குற்றச்சாட்டுகளுடன் பள்ளிக்கல்வித்துறையை மோசமான நிலைக்குக் கொண்டு சென்றதுதான் செங்கோட்டையனின் சாதனை. ஒருவர் எத்தனை காலம் அரசியல்வாதியாக இருந்தார் என்பது பெருமையல்ல, தன்னுடைய அரசியல் பொதுவாழ்க்கையில் யாருக்குப் பயனாக இருந்தார் என்பதைப் பொறுத்தே பெருமை அமையும்.
50 வருடம் இருந்த கட்சியே இவரைத் தூக்கி எறிந்துவிட்டது. ஆனாலும், அதிகாரம் இல்லாமல் இருக்க முடியுமா? அதனால் புதிதாக தொடங்கப்பட்ட கட்சிக்குப் போய் பதவி பெற்றிருப்பதுதான் செங்கோட்டையனின் நீண்டகால அரசியலின் சாதனை.
About the Author
