தஷ்வந்த் நிரபராதி என்றால் ஹாசினியை கொலை செய்தது யார்? என்ற கேள்வியை எழுப்பி இருக்கிறார் அன்புமணி ராமதாஸ்.
கடந்த 2017ம் ஆண்டில் பிப்ரவடி 7ம் தேதி அன்று சென்னை போரூர் அடுத்த மதநந்தபுரத்தைச் சேர்ந்த 6 வயது சிறுமி திடீரென்று காணாமல் போனார். மாங்காடு போலீசாரின் விசாரணையில் ஹாசினியின் வீட்டின் அருகே வசித்து வந்த இளைஞர் தஷ்வந்த் கைது செய்யப்பட்டார்.
சிறுமியுடன் அடிக்கடி விளையாடி வந்த தஷ்வந்த், அன்று தன்னுடன் மாடியில் விளையாடிக் கொண்டிருந்த ஹாசினியை தன் வீட்டிற்குள் அழைத்துச் சென்று பாலியல் வன்புணர்வு செய்ததில் சிறுமி உயிரிழந்துவிட்டதால், உடலை ஒரு பையில் எடுத்துச்சென்று நெடுஞ்சாலை ஓரத்தில் போட்டு தீவைத்து எரித்து விட்டு வந்ததை விசாரணையில் ஒப்புக்கொண்டார் தஷ்வந்த்.
இந்த வழக்கில் போலீசார் குற்றப்பத்திரிகையை தாக்கல் செய்ய தாமதம் ஆனதால், தஷ்வந்தின் தந்தை மகனை ஜாமீனில் எடுத்துவிட்டார். தங்களது வீட்டையும் குன்றத்தூருக்கு மாற்றிவிட்டனர். டிசம்பர் மாதத்தில் 2ம் தேதி அன்று செலவுக்கு பணம் தராததால் தன் தாயை அடித்துக்கொன்றுவிட்டு, பணம், நகைகளை எடுத்துக்கொண்டு மும்பைக்கு தப்பிவிட்டார் தஷ்வந்த். போலீசார் 6ம் தேதியே அவரை கைது செய்துவிட்டனர்.
இரட்டை கொலை வழக்கில் மென்பொருள் பொறியாளர் தஷ்வந்துக்கு தூக்குத்தண்டனை மற்றும் 46 ஆண்டுகள் சிறை தண்டனை விதித்தது செங்கல்பட்டு நீதிமன்றம். சென்னை உயர்நீதிமன்றமும் இந்த தீர்ப்பை உறுதி செய்தது.
இதை எதிர்த்து உச்சநீதிமன்றத்தில் தஷ்வந்த் சார்பில் தொடரப்பட்ட வழக்கில், காணொலி மற்றும் கண்காணிப்பு காமிரா காட்சிகள் போதுமானவை அல்ல. டி.என்.ஏ சோதனை முடிவுகள் ஒத்துப்போகவில்லை என்று கூறி அவரை உச்சநீதிமன்றம் விடுதலை செய்திருக்கிறது. தாயை கொலை செய்த வழக்கிலும் பிறழ்சாட்சியத்தை பயன்படுத்தி கடந்த மாதம் தஷ்வந்த் விடுதலையான நிலையில், இப்போது இந்த வழக்கிலிருந்தும் விடுதலையாகியுள்ளார்.
’’இது தமிழ்நாட்டின் குழந்தைகள் பாதுகாப்பு வரலாற்றில் ஒரு கருப்பு நாள்’’ என்கிறார் அன்புமணி ராமதாஸ்.
மேலும், தஷ்வந்த் தவறு செய்யவில்லை என்றால் ஹாசினியை கொலை செய்தது யார்? என்ற கேள்வியை எழுப்பி இருக்கும் அன்புமணி, இந்த வழக்கில் தொடக்கத்திலிருந்தே விசாரணை சரியாக நடைபெறவில்லை. 3 மாதங்களுக்குள் குற்றப்பத்திரிகை தாக்கல் செய்யப்படாததால் தஷ்வந்துக்கு ஜாமீன் கிடைத்தது. அப்போதிலிருந்தே இந்த வழக்கு தடம் மாறத் தொடங்கி விட்டது என்று குற்றம்சாட்டுகிறார் அன்புமணி.
தமிழ்நாட்டையே உலுக்கிய இந்த வழக்கில் வலிமையான ஆதாரங்களை காவல்துறை தாக்கல் செய்திருக்க வேண்டும். டி.என்.ஏ ஆய்வு முடிவுகள் கூட ஒத்துப்போகும் வகையில் இல்லாததால் தான் தண்டிக்கப்பட்ட குற்றவாளி விடுதலை செய்யப்பட்டிருக்கிறார்.
குழந்தைகள் தான் வாழும் தெய்வங்கள். அவர்களை பாலியல் வன்கொடுமை செய்து கொலை செய்த மனித மிருகத்துக்குக் கூட தண்டனை பெற்றுத்தர முடியவில்லை என்றால் நமது சட்ட செயலாக்க அமைப்பும், வழக்கு நடத்துவதற்கான கட்டமைப்பும் எந்த அளவுக்கு பலவீனமாக உள்ளன என்பதை புரிந்து கொள்ளலாம்’’ என்று சொல்லும் அன்புமணி, இனிவரும் காலங்களிலாவது இது போன்ற கொடிய வழக்குகளில் குற்றவாளிகள் தண்டிக்கப்படுவதை உறுதி செய்யும் வகையில் சீர்திருத்தங்கள் செய்யப்பட வேண்டும். சிறுமி ஹாசினி பாலியல் வன்கொடுமை மற்றும் கொலை வழக்கில் தஷ்வந்த் விடுதலை செய்யப்பட்டதை எதிர்த்து மறுஆய்வு மனுவை அரசு தாக்கல் செய்ய வேண்டும்’’ என்று வலியுத்தி உள்ளார்.
About the Author
